Diasabra algo pasa di 9:30 pm, polis a para un auto marca Toyota modelo Vitz color shinishi, pa un control rutinario. Asina cu e defensornan di ley a yega na e auto den Madiki y nota e actitud di esunnan den auto, nan tabata sa cu a canta bingo!
Den e auto tabatin no menos di tres hende homber y ningun di nan tabatin ni un punt’i papel of permiso den nan poder. Y sin un permiso legal di estadia, no por ta riba nos isla.
Mesora a detene e trio aki y a transporta nan pa ward’i polis pa verifica nan documento y pa por pasa nan den man di Guarda Nos Costa pa deportacion. Cadi diariamente polis ta topa cu hende indocumenta na Aruba y ta detene nan y hiba Guarda nos Costa pa deportacion. Echo ta cu nan tur ta soña cu un bon trabou na Aruba, pero cu net awo ta masha scars.
