Pa basta tempo caba Stichting Monumentenfonds Aruba (SMFA) ta enfrentando un situacion fastioso caminda e casonan di vandalismo ta aumentando na locual ta trata nos monumentonan, principalmente den Oranjestad. Ultimamente esaki a bira un problema practicamente diario. Generalmente ora un di nos edificionan haya daño di vandalismo, SMFA ta scoge pa no pone hopi atencion na esaki den media pero ta percura pa drecha esaki mas pronto posibel p’asina nos huurdonan por sigui funciona sin problema.
Lamentablemente e gastonan cu ta bin cu esaki tambe ta aumentando considerablemente, e fundacion tin miles di florin na reparacionnan causa pa vandalismo pa aña. E dañonan ta varia entre porta y bentananan kibra te cu candelanan cu ta keda cende na e monumentonan cual ta causa daño grandi na e edificionan. Hopi di e daño aki ta causa pa adictonan ambulante cu ta haci uzo di e edificionan anochi pa drumi of ta kibra pa purba horta den e edificionan. Esaki ta un problema social cu a bin ta aumentando e ultimo temponan y cual ta forma un molester y te hasta un peliger pa nos huurdonan.
Nos ta consciente cu e problema social ta grandi y cu esaki no lo tin un solucion na termino cortico. Un problema asina compleho mester di un solucion integral y ta rekeri colaboracion di entre otro varios instancianan di gobierno, polis, comerciantenan y fundacionnan. Den tur huurovereenkomst di SMFA a pone cu responsabilidad di siguridad ta cay bao huurdo. Pero pa evita problemanan mas grandi y pa mustra boluntad pa busca un solucion, SMFA a tuma e prome paso. Hunto cu Tara Prevention, cu ya caba ta encarga cu siguridad di entro otro Museo Arkeologico y Museo Historico, y cu Santos ‘Coffee with Soul’ cu a habri su portanan band’i Censo na december aña pasa. Directora di Monumentenfonds Aruba, Anne Witsenburg, a acerca diferente di e huurdonan di nos monumentonan pa yega na un solucion pa evita menos kiebro na e edificionan.
Tara Prevention lo amplia e area asina cubriendo e demas monumentonan den a area di Schelpstraat tambe. Pa locual ta e area di Stadhuis, Censo y Algemene Rekenkamer a haya cooperacion te ainda di Santos ‘Coffee with Soul’ cual hunto cu Monumentenfonds Aruba lo cubri parti di e gastonan di siguridad pa e area aki. E siman aki lo inicia cu e siguridad den e dos areanan y e plan ta pa haci esaki pa un aña largo y asina evalua despues di algun luna e efectividad di esaki.
Mientras SMFA ta sigui den combersacion cu e demas huurdonan, gobierno y comerciantenan.
Esaki ta trece cu ne un gasto acerca pa e fundacion pero ta spera cu lo por yuda baha locual ta e gastonan di reparacion di dañonan causa pa vandalismo.
