Diadomingo 9 di februari, e paradanan di carnaval a ranca sali cu esun di San Nicolas. Pero sin lubida e traspaso di mando cu a tuma luga manera tur aña dilanti di Bestuurskantoor, caminda prome minister di Aruba, Evelyn Wever-Croes, a duna un caluroso bon bini na nos dirigentenan di carnaval.
Durante nan discurso, Prins Spaghetti y Pancho Meatballs a trece varios punto dilanti, di cual esun di mas controversial pa bin cu SAC bek, cual hopi a interpreta esaki como un indirecta pa SMAC sea pa nan baha of pa nan join cu SAC.
E decreto di Prins y Pancho ta bisa como lo siguiente:
1. Kier pa Carnaval sali for di San Nicolas y pa caba na Playa, ya e ora tin menos pleitamento y ta traha un Carnival Village number 2 na Playa pa pueblo stop di keha, pasobra no ta duna gasolin, presupuesto ta preta.
2. Kier nan propio programa na radio pa trece cosnan positivo so. Nada negativo cu drama.
3. Pa stop di boltermento di auto riba Green Corridor, kier pone polis drumi di biaha, pa asina evita mas accidente, ya tin mas tempo pa patruyanan haci nan control di documento.
4. Kier un comision nobo pa Carnaval bao di e nomber SACMA cu ta SAC y SMAC pa hunto haci nos carnaval mas grandi.
5. Na prome minister, Evelyn Wever-Croes, ta wordo poni riba un vakantie mandatorio. El a gosa di esaki den un hotel menos cinco strea p’abao di Boneiro riba oceanview pa lama.
6. Lo regala tur e artistanan creador di corona pa Prins y Pancho, un thermometer pa por pisa coronanan y pa preveni pa e Prins y Panchonan haya alzheimer.
7. Pa minister di asuntonan social y famia, lo ta encarga cu cuido y supervision di e chikitonan durante tur eventonan carnavalesco, na e siguiente shelternan: Parha grandi, Doddo Daddy, Seda y Catuna pa asina tur mayor por gosa carnaval bay off sin mester di carga cabes cu nan yiunan.
8. Prins y Pancho lo habri un museo politico. Tur pero tur politico cu baha cu pensioen y retira, lo ta den display den nan prestigioso museo.
9. Como Prins y Pancho lo sigui caba cu e proyecto di tram cu gobierno anterior a priminti, cu tram lo core di San Nicolas pa Playa y di Playa pa Willemstad.
10. Por ultimo kier a tuma full e mando di Gobierno over y pa caba di subi e BBO na 18%, BAZV, 19% y Health Tax na 20% y salario minimo caba di baha na 500 sin kita belasting, laga pueblo di Aruba participa den paradanan di Carnaval gratis, cu excepcion di e ministernan. Ta desea pueblo di Aruba un dushi carnaval 66, cu hopi gozo pero safe di mes. Ban aprecia otro, ban respeta otro y ban uni mas cu otro pa asina forma un carnaval placentero.
