Team pa Ronde Van Aruba lo core bou nomber “Trempan”. E acogida ta grandi un biaha mas pa Ronde van Aruba. Ta spera cu lo presenta alrededor di 800 participante na e punto di salida. Durante algun luna por a tuma nota di diferente team di coredo di distancia ta train duro tur rond di nos isla. Anticipacion pa participacion ta abrumador. E ruta di 72 kilometer por core den diferente categoria. Por haci esaki como individuo, como duo of cu un team di careda di relevo.
E aña aki un cantidad record di participante a inscribi pa core e buelta como individuo. En total tin den esaki 20 homber y muhe. E otro participante- y teamnan ta cuminsa entre 8:00 pm y 12:00 am riba diabierna anochi. Cada minuut un team of duo nobo lo start.
Publico manera ta custumbra ta mas cu bon bini a lo largo di e ruta pa curasha y aplaudi e coredonan. Ademas di esey na cada un di e postnan di cambio lo por tende musica pa publico y participante.
Careda di distancia largo a bira un di e deportenan mas comenta ultimo tempo. Hopi atleta ta dedica y sacrifica tempo y energia den e deporte aki pa mira cada biaha un miho presentacion. Pa e motibo aki, Trempan ta pone su confiansa un biaha mas y ta sponsor e team Train Hard Race Easy (THRE) pa e Ronde van Aruba e diasabra marguga aki.
E nomber di e team, Train Hard Race Easy (THRE) ta papia pa su mes, nan ta den training extensivo pa e careda na caminda. Como un di nan sponsornan, nos ta sostene y lo compaña nan riba ruta. TREMPAN ta mira e importancia pa brinda e sosten aki na nos atletanan, cu ta haci esfuerso pa hiba e deporte dilanti y ta ehemplar na e comunidad cu kier forma parti di e mundo di deporte.
Riba anochi di 20 di mei 2022 e di 30 edicion di e Ronde van Aruba lo start. E evento di careda, organisa pa Marinierskazerne Savaneta, ya ta existi desde 1971. Dos marinier un tempo pasa a reta nan mes pa core ‘solo’ rond e isla. Desde e momento ey e idea aki a crece bira un evenemento cu anualmente ta ripiti. E distancia ta 72 kilometer di largura, locual pa gran parti ta sigui a lo largo di costa di e isla y ta un di e caredanan di mas pisa y largo den Region Caribe. Gobernador di Aruba, Su Excelencia Gobernador ta esun encarga mayoria di biaha pa duna e tiro pa salida. Tur clase di exito ta bay na cada participante pero muy specialmente na team Train Hard Race Easy (THRE) cu lo carga e logo di Trempan pa e careda aki.
