Den un di e cartanan e trahadonan a expresa cu nan no tin confiansa mas ni den sr. Ruiz, ni den Luis Oduber.
Segun Eric Henriquez, presidente di SIWA, director ta na altura di carta, pero como miembro di directiva y presidente di sindicato, no ta para tras di e carta aki ainda.
E ta un carta cu no a wordo firma ainda. Kiermen tin cu analisa esey. E parti huridico tambe ta wak cierto cosnan den dje. Pero un carta pisa asina a bay pa e sindicato y a entreg’e na director.
Desigualdad
Un grupo kier un porcentahe di aumento mas halto cu e trahadonan cu ta gana menos. Segun Henriquez, e parti eynan ta uno cu tin’e gevries. Ta un parti cu tin cu discuti ainda riba dje. Pero ora cu un director di anochi pa mainta ta duna cosnan extra na un grupo. Awo si e por tum’e pa e grupo aki, e por tum’e pa e resto.
Si e bin bisa awe mañan cu ta Utilities of gobierno a dun’e permiso, tin cu dun’e na e resto di e trahadonan y no na un grupo so. Asina simpel e ta.
E director mes ta dicidi di duna un aumento mas halto na porcentahe, cu e ta duna su coleganan empleado, cu ta mas abao cun’e.
Henriquez a splica cu ta riba 90 persona. E porcentahe ta igual cu e trahadonan, pero pa loke ta beneficionan, nan a duna extra. Nan a habri e gap mas. Manera spaargeld, vakantieuitkering y tambe dianan di vakantie. Nan a aumenta eseynan.
Esaki a sosode den e maneho di e director actual. No a cera e gap full, pero a cere un tiki. Sinembargo e director a bira habri’e bek pasobra nan merece. Nan tambe ta haya cu nan tambe merece.
Den e CAO, ta SIWA ta negosha esaki. Loke a sosode, ta e director a regala e beneficionan na e grupo aki. Ora cu bay regala un otro grupo, e trahadonan tambe kier e regalo aki. E ta conta pa tur. Kier pa pueblo tambe haya regalo. Asina simpel e ta.
Ambiente di negociacion
Pa loke ta ambiente di negociacion, e respet no tey. Tin un director financiero, sr. Ruiz, kende tin un actitud hopi agresivo na mesa. Por ta esey ta su estilo. Den WEB no conoce e style aki, segun Henriquez. Si e kier pa bay den e direccion eynan, SIWA ta dispuesto pa bay den e direccion ey. Nan no tin miedo. Pero esey no mester ta e idea.
Un dia crucial
For di e carta, ta pidi cabes di ambos director, pero SIWA no ta cana riba esey. Obhetivo ta e CAO. Nan ta wardando e contesta cu SIWA a manda awe, diabierna. E carta menciona, a bin for di un grupo na banda. Esey lo bay deal cun’e, y wak ta con esaki ta bay, segun Henriquez.
Mensahe pa Oduber y Ruiz
Un mensahe Eric Henriquez tin pa nan ta pa bay sinta y un cos ta pidi nan tambe. Busca ayudo pa yuda nan, pasobra nan no por. Gobierno, pone nan busca un hende yuda nan. Nan no por. Nan ta mucho concentra pa otro cos. Nan ta kere cu nan por, pero nan no por, segun Henriquez.
E cos aki no mester bay caba na malo. E mester keda bon pa por sali for di esaki. E salida aki ta “om de hoek”. Pero mester tin boluntad.
