Trahadonan di FCCA a dicidi di pone trabao abao. Nan ta mal contento, mirando cu ya caba pa 1 aña y mey pasa, e referendum a tuma luga y FTA a gana e referendum. For di e dia ey, ta cinco of seis biaha nan a sinta cu gerencia. Awor aki tin cierto desaroyonan cu ta strobando pa e CAO wordo negosha.
Presidente di FTA, Hubert Dirksz a splica cu e trahadonan a bin pafo pasobra e comportacion di gerencia no ta manera mester ta. Como partner den un relacion bo no por comporta di e manera aki. FTA a gana e referendum aña pasa na Februari, pero te cu awe no por negosha drechi. Compania ta insisti cu e mester keda cu rechtspositieregeling pa e trahadonan, pasobra e tin ultimo palabra. E ta dicidi y haci den e compania y esey no por.
Trahadonan ta opta y ley ta dunabo espacio pa bo por negosha e CAO y tin cu respeta esey.
No por ta asina cu kier saca tur hende for di nan derecho di participa den CAO. Na prome instante ta bisa cu nan no mag di bira miembro.
Door cu e carta cu nan a manda FTA ultimo bisando cu si e sindicato no hala su palabra atras, den otro palabra acepta loke gerencia ta propone, nan no ta sinta na mesa pa negosha. E ora tin cu protesta.
Mester bay mesa y yega na un proceso di negociacion, manera mester ta pa yega na acuerdonan.
Referendum
Dirksz ta calcula cu entre 5 pa 6 biaha e dos partidonan a reuni. Esey ta nifica bin na mesa, papia algun cos bay bek, yen di tardamento. Sa cu den mundo di negociacion tanto compania y abogadonan gusta usa delay tactica, tactica di tardansa, pasobra tin e oportunidad e ora pa pone presion riba e trahadonan, pa bo logra bo meta. Manera den e caso aki nan kier saca tur hende for di sindicato. Esey ta e actitud cu nan tin. Tin trahado, ex shopstewards cu a bringa FTA den e proceso pa por bay pa un CAO, cual ta lamentabel cu e ta pasa. Te hasta awor aki ta haya cu na mesa no tin e hendenan principal pa tuma decision. Ta negoshando cu abogado y e director di recursonan humano. Aki falta seriedad. FTA no ta duda den e seriedad den esnan cu ta na mesa, pero mester tin hende na mesa cu por tuma decision y no hunga e wega di tactica aki. No falta e respet pa e sindicato y e trahadonan, y esey ta sosodiendo.
Falta di respet
Trahadonan di FCCA tin basta miembro den FTA. Unico momento mas fuerte cu a yega di para, ta pa sali na defensa di e compania y di e director e tempo ey. Awe ta pasando net contrario, caminda cu e director su actitud ta cambia. Maske e trahado kier ta husto, no ta haya e comprondemento di e compania pa esaki. Bo ta haya cu FTA tabata tin un mayoria grandi den un lucha hopi fuerte ora cu e trahadonan a dicidi pa bay scoge pa yega na un acuerdo via CAO en bes di un rechtspositie regeling. E lucha ey FTA a gan’e net net. Por bisa cu nan ta un poco mas di 50% di miembro na FCCA actualmente.
Rason
E intencion di gerencia ta pa keda cu e poder. E trahado no tin ultimo palabra. Ta negosha, pero tin nan na un liña pa por dicidi y esey no ta corecto. Ta berdad si cu tin cierto funcionnan cu ta manager, logicamente eseynan, no cu nan por ta miembro di sindicato, pero nan tin un funcion diferente. Pero no trahadonan simpel kier saca nan for di sindicato. E ora ey pakico nan kier keda cu rechtspositie regeling, pasobra e trahado no ta compronde su poder cu e tin den un CAO. Tur loke tin den e CAO na mesa, ta identicamente cu loke tabata tin den e rechtspositieregeling. Awor aki e wega di semper, cual hopi doño di trabao ta usa, ta pa bay guera. Si ta den e direccion eynan mester bay, segun Dirksz, e ora ta crea disturbio laboral y esey ta pasando.
Sindicato
FTA a para pa un ora, cual ta calcula cu ta un protesta y ta na su luga. Si esaki no yega cu ta bay mesa y yega na un negociacion manera mester ta, e tin tendencia, e tin chens pa escala.
Si e carta ta bisa cu no ta sinta na mesa, mientras cu no hala e palabra atras, e ora kico tin di haci e ora, segun Hubert Dirksz.
Unda por cana
Legalmente FTA ta usa su derecho pa protesta. Si ta necesario ta haci uso di mediador. Cos por escala, Dirksz a comenta.
