Trahadonan di DIP a pone trabou abou den oranan di mainta. Esaki ta algo cu a premira, mirando e señalnan cu nan a manda ultimo dianan.
Na e sitio a combersa cu Linda Rasmijn, kende a lesa un declaracion. Den esaki e ta bisa e trahadonan di DIP ta hoi preocupa cu e maneho di e director Jaime Croes. A manda e director como prome minister un carta pa papia riba e problemanan. Te ainda no a haya contesta pa e reunionnan aki. El a enfatisa cu nan kier brinda un bon servicio na e departamento, pero ta sinti cu e director di e departamento no ta haciendo un bon trabou. Nan ta papia di integridad.
E representante di sindicato SEPPA na e sitio tabata Edmundo Marlin, Secretario di Organisacion di SEPPA.
El a splica cu e carta a bay pa prome minister for di dia 15 di januari y a splica e motibo. SEPPA mes a haya e carta e siman siguiente. Nan mes a dicidi di dirigi un carta na minister pa atende cu e peticiondi e trahadonan, ora cu no a mira cu a haya contesta. A urgi e mandatario pa otorga e reunion aki mirando cu e preocupacion na e departamento ta basta grandi. Nan ta sinti tambe cu tin represalia cu ta tuma contra nan.
A topa tambe cu e trahadonan, kende a dicidi di tene e walkout pasobra no a haya ni contesta pa nan carta. Ta sinti cu e mandatario no ta duna oido.
E problema ta cu e maneho cu e director ta duna no ta yuda mehora servicio na e departamento, cu ta bayendo atras. Tin problemanan interno cu ta e mandatario mester atende cu esaki. Ayera nan a haya un email di e mandatario, kende a pidi pa e trahadonan sinta cu e director pa trata di yega na e solucion. Y si no a logra yega na otro, lo bini cu comision.
E sugerencia mester duna na e trahadonan. Pero e deseo ta pa e trahadonan informa e mandatario kico ta pasa. E proposicion di prome minister nan a rechasa, pasobra a sinta caba cu e director y e no a duna resultado. Asina cu e walkout caba, lo manda e contesta pa e mandatario.
E walkout ta pa pone presion pa nan peticion, e sindicalista a bisa. “DIP ta un ticking time bomb”.
