Claro cu prensa a hunga un rol escencial dia 13 di october 1990, ora cu un baranca grandi a bin abou for di Hooiberg, pasa dor di un cas, Hooiberg # 83 cu consecuencia fatal pa un señora drumi riba su cama pa 3:00am. Johnny “Django’ Simoons di matutino Diario tabata un di e prome reporteronan pa yega na e sitio di incidente e dia ey. E ta corda e suceso manera ta dia di awe, aunke awe ta precisamente 30 aña despues.
Django ta corda cu e tabata drumi y e scanner di Polis tabata riba su cabes di cama. E por a tende esun cu tabata traha e momento ey den Centrale Post di Polis, mandando patruya direccion Hooiberg cu algo grandi a sosode. Tabatin yobida y cu baranca a los y a bin abao. El a sali fo’i cas. Di baina e por a yega na subida di Hooiberg, mirando tanto caminda cu tabata tin cera. Pero si el a nota cu tabatin un trailer basta pisa cu grua riba dje pa brinda asistencia pa hala e baranca.
Django Simoons a sigui conta cu un ex colega di dje, defunto Margarita Els, tabata doño di e cas aki. E mes tabata biba na Corsou y a dicidi despues di basta aña bin bek Aruba. Margarita a conta Django cu el a pidi famia Frank e cas bek, pero cu e señora a pidi algun luna pa nan mira con nan ta haya un otro cas. Pero nunca mas famia Els a drenta den e cas. Pasobra e cas no ta existi mas, baranca a caba cu ne.
Django Simoons ta kere cu riba e dia specifico aki, ta dor di e yobida asina pisa, a haci cu e santo a bira asina moli, cu e awa a stroom bin abao. A base di e stroom, e baranca lo a los y a bin abao. Na e cas otro banda di caminda ainda por mira dos di e barancanan ey cu a lora bin abao.
“E tabata algo hopi tristo pa mira”, Django a conta. Por ultimo, Django a sigura cu te awe no tabatin nada parecido a tuma luga na Aruba. E ta por lo menos un di e miembronan di prensa cu a yega di pasa dor di hopi suceso pero no ta corda cu nunca mas tabatin un tragedia di naturalesa di e indole aki, pio cu tabatin un final asina tristo.
Tocante Hooiberg
Hooiberg ta un formacion volcanico halto riba nos isla cu ta midi 165 meter. E no ta e cero di mas halto, esey ta Jamanota cu ta midi 189 meter. E ta localisa mas of menos na e centro di Aruba y por mir’e for di diferente parti. E palabra Hulandes hooiberg, por traducie literalmente como haystack na Ingles. E ta parce stapel di hooi. E tin un total di 662 step. Riba un bon dia por mira Venezuela para desde e cero. Riba Hooiberg por haya diferente antena di radio, pero tambe antena di nos compania di telecomunicacion Setar. Riba top di e cera por topa cu un piedra yama Hooibergiet. E ta un di e piedranan mas bieu di Aruba, den color di cristal preto. E piedra ta masha scars awendia na mundo. Na aña 1951 Eduardo Tromp a traha e prome trapi pa subi Hooiberg. Tabatin 900 stap. Na aña 1990 a start un proyecto pa renoba e trapi y asina a inaugura e trapi nobo na 1991 y e cantidad di stepnan a baha na 662.
