Hortencia Maduro, Presidente di Toastmasters Club Aruba pa e seccion di “Baranca” a splica un poco mas tocante nan campaña pa haya mas miembro. A tene un anochi informativo diasabra 20 di april 2024 na Biblioteca Nacional Aruba.
E organisacion ta contento pa informa di un resultado significativo y un participacion yen di entusiasmo di e comunidad Arubano.
Cuatro club di Toastmasters na Aruba: “Baranca, Orua, Universidad di Aruba y Yamanota” a uni forsa pa e evento aki. Meta di e evento tawata pa aumenta conscientisacion tocante e mision di Toastmasters, cu ta coincidi cu celebracion di e 100 aniversario di Toastmasters.
E publico cu a atende e anochi informativo, tabatin e oportunidad pa participa den dos sesion educativo di Toastmasters y experencia un tiki di un reunion di Toastmasters pa medio di speech, evaluacion y ehercicio inespera di papia.
Minister Ursell Arends encarga cu e cartera di Transporte, Integridad y Adultonan mayor a hiba e discurso di apertura. E mandatario a comparti su mesun experencia di Toastmasters y a enfatisa e importancia di Toastmasters den e desaroyo personal y profesional.
Toastmasters ta yuda den liderazgo, trece dilanti un discurso (public speaking). E beneficio di por hiba un discurso dilanti publico ta yuda e persona di por expresa su ideanan sin restriccion; por bisa algo facil y tin e habilidad di convence otro.
Si bo ta interesa pa bira un miembro of ta desea mas informacion di e clubnan participante di Toastmasters: Baranca Toastmasters Club, tuma contacto cu Hortencia Maduro (5937092); Orua Toastmasters Club, tuma contacto cu Tamarah Arends (5924211); University di Aruba Toastmasters Club, tuma contacto cu Leidy Ozuna (7380560 / 5656032); Yamanota Toastmasters Club, tuma contacto cu Angela Bennett (5680108).