Te ainda no por keda cla pa tuma un decision final riba mudamento di ward’i polis di Oranjestad. Pa di tres biaha awo Minister Rocco Tjon ta pidi pa cambia e fecha stipula pa tuma un decision. For di dia 10 di februari, awor a pidi Sindicato di Polis Aruba (SPA) pa tin poco mas pasenshi y dun’e un siman mas, esta te dia 17 di februari 2023.
Mando Policial y e sindicato cu ta representa polis ta riba mesun liña, esta cu e edificio den Wilhelminastraat no ta funciona y no ta apto mas pa e cuerpo di polis. Ta trata aki di mas o menos 1200 meter cuadra di espacio pero cu polis no ta uza tur, debi na varios reto cu schimmel y otro asuntonan cu ta stroba e operacion diario. Polis ta huur dos edificio di FCCA, esta esun den Wilhelminastraat y otro den Caya Betico Croes (ex-Interbank) pero den ambos nan tin keho y ta desea di kibra e contract y sali di e edificionan.
Pero awor tur partido ta realisa si, cu haya un otro edificio pa acomoda un cuerpo di polis cu ta opera 24 ora pa dia, no ta facil. No tin un edificio para eynan ta warda riba polis pa huur. Den mayoria caso lo mester haci adaptacionnan, sea grandi of chikito, mara na extra inversion y tempo…cu ta precisamente locual no tin awor aki.
Ta busca solucion tanten
E comision cu a sali busca un edificio ideal pa muda Cuerpo Policial Aruba tin un meta, muda e polisnan den algun dia. Nada cu mester bay drecha e luga, mester warda, mester haci destaho publico, etc. Esey lo tarda un aña atrobe prome cu por cristalisa. Tambe, nan ta sigui e promesa di gobierno di cu lo yega na un acuerdo cu APFA, cu lo a cumpra y awo mester huur e edificio di ex-Codemsa of ex-Aruba Airlines for di nan. Pero como cu tur hende ta consciente cu esey lo tarda pa renoba, cu mester busca un solucion pa tanten.
A keda na dos opcion riba mesa
E comision a evalua varios opcion di edificionan para y cu ta disponibel pa gobierno por huur mesora. Na final, despuesdi a bishita nan y a check e condicionnan bou cual kier huur cu gobierno, banda di e necesidadnan pa acomoda un warda di polis, a resta solamente dos opcion. E prome ta ex-edificio di Bon Bini Bazaar den Caya Betico Croes, cu tin algun aña para. E ta grandi suficiente pero cu basta trabou di renobacion pa haci na dje prome cu por muda y drenta ey. Tambe ta bin acerca cu polis ta sinti cu trafico no ta na nan fabor, eybanda sa ta ocupa y polis lo no tin caminda liber pa sali pura pa un caso di emergencia. E otro opcion ta e edificio completamente renoba den Paardenbaaistraat unda antes Consulado Venezolano tabata situa. E compania Hulandes, AA Installatie a cumpra e edificio y lo a hacie nan oficina principal. Pero, ora cu SPA a acerca nan, a mustra disponibilidad pa huur e cu gobierno.
Boluntad ta hopi pero t’e caminda ta leu
Na final di tur local polis y SPA kier, ta bin riba mesa locual cu por. Mester tene cuenta cu actualmente Cuerpo Policial Aruba ta paga Afl. 27.50 pa cada meter cuadra cu ta huur pa nan ward’i polis Oranjestad situa den Wilhelminastraat y cu ta pertenece na Fundacion Cas pa Comunidad Arubano (FCCA). Si cont’e bon, e edificio ta consist di 1200 m2 y como tal ta costa no menos di Afl. 33.000,= pa luna!
E edificio temporal situa den Paardenbaaistraat, si acaso dicidi pa huur esey mes, lo mester a costa Afl. 30,= pa cada un di su 600 meternan cuadra, cu ta pone cu e huur mensual lo costa Afl. 18.000,= pa luna. Den comparacion cu loke ta pagando awo, ta mas o menos mita, pues lo baha for di 33 pa 18 mil florin pa luna. Pero, di otro banda, lo tin menos espacio disponibel tambe. Ta bay di 1200 pa 600 meter cuadra di oficina. SPA ta sinti cu asina mes e ta bon, pasobra e edificio ta nobo y lo acomoda algun seccion, manera Jeugd en Zeden Politie (JZP) den un otro edificio.
Huur a subi drasticamente
Pero, aunke cu e negosacionnan tabata cana smooth, na momento cu doño di e edificio situa den Paardenbaaistraat a tende cu no lo huur su edificio pa cinco aña sino pa menos…mesora e prijs di huur a cambia. No ta conoci cuanto el a bira finalmente pero a subi mucho mas cu e 30 florin pa meter cuadra, pa luna.
E comerciante a splica cu su intencion di huur ta solamente si ta pa un duracion di cinco aña, pa e por recobra su inversion haci pa drecha y modernisa e edificio cu tabata para pa basta aña eynan.
Gobierno ta insisti cu no por compromete na un periodo asina largo, pasobra tin un contract firma cu APFA pa huur e edificio na Cumana asina cu e ta cla. Te awor ta estima cu lo por dura un te cu un maximo di dos aña prome cu tur cos lo ta cla pa muda.
E doño di e edificio a laga KPA sa cu e ta compronde pa nan, pero nan tambe tin cu compronde pe, cu si kier huur pa menos aña, e ora e condicionnan ta cambia. Esey obviamente ta hinca Minister Rocco Tjon den un problema cu e presupuesto di husticia. Ley ta stipula cu gobierno por huur un edificio te na un maximo di 30 florin pa meter cuadra, pa luna. Bou casonan hopi excepcional, por paga un poco mas, por ehempel si e edificio ta un monumento, etc. Pero djis pasobra e periodo ta menos di cinco aña lo no ta un motibo valido, pa cual e lo bira masha dificil pa haya aprobacion di Conseho di Minister y pa despues pasa door di scrutina di e organonan di control di gobierno.
Wilhelminastraat vs Cumana
Cuerpo Policial Aruba ta convenci cu mester bay den un edificio mas central, situa mas accesibel y cu por yega tur caminda mas lihe, cu tin espacio pa henter nan personal y pensando cu lo sigui crece den e añanan nos dilanti. Den cuadro di esey a pensa prome riba Brown Building na Wayaca y despues riba e edificio unda antes Codemsa tabata situa. Actualmente gobierno ta huur e edificio den Wilhelminastraat, cu ta midi 1200 m2, pa un suma di Afl. 33.000,= pa luna. Pero, den e plan nobo, kier muda pa un edificio cinco biaha mas grandi pero cu lo costa Afl. 172.000,= pa luna na huur! Claro cu ta menciona di lo kier compartie cu CEA, Migracion Aruba y otro departamentonan, pero asina mes…si suma tur huur hunto, ainda lo no yega na 172 mil florin pa luna.
Decreto ta firma!
Dia 30 di november 2022, Minister Rocco Tjon a bay Parlamento di Aruba y a pidi apoderacion pa e por cera un contract di huur cu Stichting Algemeen Pensioenfonds Aruba (APFA) pa e huur un of mas edificio pa KPA, CEA, Migracion y Bureau City Inspector. Consequentemente, dia 13 di december 2022, e ministernan Tjon, Arends y Oduber a firma un decreto nacional (Landsverordening) hunto cu Gobernador Boekhoudt, pa cera e deal ci APFA numa na balor di Afl. 172.000,= pa luna. A acorda cu anualmente, entre 2025 pa 2030 por hisa e huur cu un maximo di 4% pa luna y desde aña 2031 por his’e cu un maximo di 1,5% pa luna.
Traspaso straño
Por corda cu na luna di februari 2021, nos a publica un noticia cu e entidad AIB Vastgoed tabata na mesa cu Minister Andin Bikker pa por a yega na un acuerdo pa nan cumpra e edificio di banco, drech’e y huur e cu Gobierno di Aruba pa Cuerpo Policial Aruba. Pero den un luna di tempo, diripiente e plannan a cambia y a pasa e idea di AIB Vastgoed pa APFA, cu finalmente a cumpra e propiedad pero ainda no a cuminsa drech’e.
Tocante e ex-edificio di Codemsa
A construi e edificio na aña 1996 riba un total di 8 diferente tereno combina y pega na otro, conoci bou di e adres Cumana # 69. Na tur e tin un area di 21.255 m3, cu ta inclui 6.908 m2 di espacio di oficina den e edificio grandi aki, cu inicialmente a traha pa negoshi y deposito. E ta parti den e edificio principal di 5960 m2 sigui pa un edificio adicional den cura di 948 m y un espacio pa “storage” di 456 m2. E doño tabata pidi Aft. 8.934.660,= p’e. Por corda cu e comerciante Johnny Chemaly tabata envolvi cu Codemsa na su inicio y despues a pas’e pa Edwin Thiel. Retonan a presenta y cu tempo e compania a bay bancarota.
No ta prime ward’i polis den forma di PPP
No ta nada nobo, esta cu un compania ta financia, construi y mantene edificio como warda di polis. E ward’i polis di Noord y esun di Santa Cruz, ambos ta via un fiansa den un construccion cu e compania ALBO. Ta for di aña 2004, tempo cu def. Rudy Croes tabata Minister di Husticia a regla e “deal” ey. Y polis te awe ta contento cu ne pasobra e compania ta encarga cu tur “‘groot onderhoud” y polis mes ta haci e trabounan di reparacion facil y chikito. Awor aki e unico ward’i polis di gobierno ta esun na San Nicolas, pasobra esun den Wilhelminastraat ta di FCCA.
