E cifranan di turismo pa cu luna di januari ta conoci y ta hopi alentador. Minister di Turismo y Salud Publico, Dangui Oduber, ta satisfecho con e comienso di aña 2023 a habri. Aña 2023 a habri mescos cu aña 2022 a cera, esta cu hopi exito.
Den luna di januari 2023 turismo di Aruba a surpasa cifranan di januari 2019 cu tabata un aña record den turismo. Den luna di januari a registra un recuperacion total di 105% den comparacion cu aña 2019.
E mercado mas grandi y importante di turismo di Aruba, cu ta e mercado Mericano, a mira un recuperacion di 113% den januari 2023 den comparacion cu januari 2019. Aruba a ricibi den januari 2023 un total di 98,942 turista compara cu e 93,953 turista den januari di aña 2019. Esaki ta un crecemento di 4,989 turista. Aruba ta sigui ta un destinacion hopi bishita, hopi gusta y cu turistanan tin hopi interes pa bishita. Pesey ta importante oa keda haci inversionan den producto Aruba pa nos por keda competitivo.
Segun e mandatario ta importante pa remarca cu Aruba ta e di 2 pais na mundo cu a recupera su turismo di e forma aki. Esaki ta demostra e resiliencia di Aruba, e maneho cu Minister Oduber a bin ta hibando y e partnership y bon cooperacion den e sector turistico di parti Aruba Tourism Authority (ATA), Aruba Ports Authority (APA), Aruba Airport Authority (AAA), Aruba Hotel and Tourism Association (AHATA) y Aruba Time Share Association (ATSA) pa logra esaki.
