Diadomingo madruga, pa mas of menos 12:15 am, dos persona a presenta na warda di polis San Nicolas cu herida di bala y dos na eerste hulp na hospital. Esunnan cu a presenta na warda di polis San Nicolas a conta cu un rato prome aparentemente un Nissan March lo mester a pasa dilanti American Bar na San Nicolas y los tiro riba un grupo di persona para pafo. Nan a sigui conta e agentenan cu nan ta total 4 persona cu lo mester a haya herida di bala.
E dosnan cu a presenta na warda di polis a bay ImSan pa tratamento medico y despues por a bay cas. E otro dos personanan cu a presenta na eerste hulp na hospital cu herida di bala a atencion medico di biaha y a keda interna. Nan situacion ta stabiel.
Patruya a bay na e sitio di e sucedido, recherche tambe a presenta p’asina haci nan investigacion.
Slachtofferhulp tambe a presenta. Cuerpo policial ta pidi encarecidamente na esunnan cu sa of a mira algo, pa yama e tiplijn di polis cu ta 11141.
