Un homber cu problema personal serio a herida su mes cu cuchiu den un cas na Palm Beach. Famia a yama Polis pa bin atende e problema di nan yiu. E yiu naci na 1997 a hinca of corta su mes den garganta.
Ora cu Polis a yega a haya e homber herida cu cortanan na garganta y varios cuchiu den su poder.
Ora el a mira Polis el a ataca Polis. Polisnan a saca nan arma reglamentario y ta los un tiro di advertencia pero esey no a yuda masha. E homber tabata haci expresion “si boso kier boso por matami”.
Y durante su expresion a sigui bin riba Polis cu cuchiu. Ni maske Polis a bise para y benta e cuchiu abou, e no a yuda. Pesey mes despues di e tiro di advertencia a sigui mesora esun dirigi pero riba pia.
Asina a logra domina e persona. Den un caso asina a cuminsa un investigacion completo unda hefenan y team investigativo di Polis y Lands Recherche a presenta na e sitio.
E mama di e persona tira a bira malo na e sitio y pesey dos ambulance a presente. Bou custodia di Polis a hiba e yiu tira pa Hospital.
E mama a ser atendi na e sitio mes pa paramediconan.
E investigacion a dura basta largo. E adres na Palm Beach no ta uno conoci pa Polis pa problema. Entrante 23 di December 2020 e adres aki no lo wordo lubida mas.
