Diabierna mainta a bati alarma pa algo cu a spanta trahadornan cu tabata bezig riba tereno di Thiel Corporation. Trahadonan a topa un cabes di carpachi humano. Esaki tabata pasa di 8 or di mainta. Mesora a avisa polis cu a presenta.
A cuminsa kibra cabes si esaki por a yega bruha den santo di exterior. A resulta cu e area di trabou no ta usa pa benta santo. Mas bien ta un area unda empleadonan ta mara hero pa basha cu beton. Polisnan cu a yega a avisa recherche. E carpachi no ta mustra algo di tempo di indjan. Ta mustra mas bien algo local cu probablemente a sali for di un of otro santana.
Autoridad tabata comenta riba un caso unda grupo di Sabana Basora a kibra kelder y te awe e cabes di un hoben asesina no a ser haya mas. 24ora mes tabata presente y a entrevista e mama di e hoben asesina cual nan a destrui e graf y saca su restonan. E resto di cabes humano ainda tin cierto vet na dje indicando cu e no ta algo di decadanan atras.
Basa riba e sospecho cu tin, lo bay haci pruebanan pa compara cu e resto di e curpa di e persona dera na Sabana Basora. E trahadonan a medio spanta. A kera cu ta algo falso. A resulta cu e tabata un carpachi real cu den un forma inexplicable a yega riba e tereno di Thiel Corporation na Canashito. E bon ta tambe cu mesora a bati alarma.
Ta un area cu nan ta traha diariamente y pesey a keda straño cu diabierna mainta ta yega haya cabes benta riba e propiedad. Ademas di e carpachi cu a disparce den Santana, tin tambe otronan cu ta perdi te cu awe. Trahadonan ta mira diariamente diferente cacho cu ta yega mainta na e tereno pero atardi ta bay bek nan cas. E trahadornan durante dia ta atende cu e cachonan.
Ta dunanan cuminda etc. Pero ora tur hende bay cas, e cachonan tambe ta bay. E cameranan di siguridad a keda di tira bista riba dje pa mira si por capta cualkier cos cu por confirma con e resto di cabes humano a yega riba e tereno na Canashito.
