Actualmente ta tumando luga na Miami, USA, e famoso Serie del Caribe (2024) di Baseball. Mark-Benson Denz representante di 24ora.com. tabata presente den Loan Depot Park unda cu e seleccion di Corsou a enfrenta esun di Mexico. Corsou a vence Mexico cu diferencia di un careda (6-5).
Hainley Statia (Manager di e seleccion) a conta cu e ta satisfecho pasobra a cuminsa training for di luna di november caba. A sigui intensifica e training cu transcurso di tempo. Di e forma ey a haya un bista unda mester reforsa e seleccion.
Den december a busca dos refuerso y asina cu januari a habri, a cuminsa cu training diariamente. Tambe ta forma parti di e seleccion e pelotero Rubiano Calvin Maduro. Y no ta prome biaha ya cu aña pasa caba el forma parti di e seleccion cu a bay Caracas pa Serie del Caribe. E ta forma parti di e staff como pitching coach. Durante un estadia na Merca, manager Statia a haya un bon impresion di Eric Mendez di Aruba. Como cu e tin paspoort Hulandes, a haci un invitacion na dje pa forma parti di e seleccion tambe.
Pa loke ta e wega mes, na inicio nan a cay atras pero e tabatin confiansa den su hungadonan. E ta corda cu e hungado Profar a bis’e “no preocupa”. Y den e inning ey mes nan a anota tres careda y den otro inning a anota dos careda mas. “Kevin Kelly a haci un tremendo trabou, pero el a cansa y haci algun fout chikito cu a causa cu Mexico a anota algun careda den di nuebe inning.” E momento ey e manager a hinca Anthony Herrera pa Corsou sigura su triunfo.
E triunfo di Corsou ta pone Statia sinti bon, pasobra e conoce e team di Mexico, cu ta un di e mihonan. El a sigui nan for di e temporada di invierno. Tanto nan picheo como nan bateo tambe y den e wega mes di diahuebs a bati tres homerun. Calvin Maduro ta conta cu aña pasa caba el a yuda nan cu scouting y awo nan a pone como pitching coach. E ta sigura cu e team di Corsou ta uno hopi bon.
E mes a bay Corsou pa dos siman pa pone e pitchernan riba un rutina di weganan tras di otro pa yuda e batiadonan tambe coy nan ritmo.
E team a bay cu 14 pitcher y ta scoge e pitcher cu ta uza basa riba e team cu nan ta enfrenta. Maduro ta bisa cu e team di Corsou tin tur cos bon, tanto picheo, bateo pero tambe defensa. Y e tin confiansa cu nan lo yega leu. Eric Mendez ta un pitcher hoben cu bon potencial den dje.
Ta studia cual ta e miho momento pa e drenta den wega. Eric Mendez mes a bisa cu asina cu nan a acerc’e, el a acepta e oferta. “Mi a prepara mi mes mentalmente.
Na Santo Domingo mi a entrena hopi.” Y mi a sigui e training despues na Corsou.
