Si un inspector di belasting no bay di acuerdo cu e peticion di e comerciante pa areglo special, e ora ey e comerciante por entrega un carta di obhecion contra e decision di e inspector. Esaki ta relaciona cu e areglo special pa comerciantenan chikito.
Esaki ta e condicionnan cu ley ta prescribe segun Meverly Romano cu ta vocero di Departamento di Impuesto. E ta un areglo special pa yuda e comerciantenan cu ta cuminsando of cu den practica nan no ta genera mucho omzet, nan no ta genera mucho benta pa yuda nan cu nan no ta haya extra gasto di BBO, BAVP, BAZV.
Door cu esaki ta algo nobo, na e momentonan aki, Departamento di Impuesto ta preparando henter e proceso, e formulario cu tin cu wordo yena. Ta preparando tur e informacionnan cu e clientenan lo mester bay haya.
Tin clientenan cu ya caba ta bin puntra kico e areglo aki ta encera. Den e dianan cu ta sigui, lo bay pone riba nan website, caminda cu e ta bira disponibel pa e clientenan por download e peticion, esta e formulario di peticion, e cliente ta yen’e y ta bin entrege na DIMP.
Ta algo basta simpel. No ta un formulario complica. Ta preparando e nota aclareatorio relaciona cun’e. Segun Pieters, den e dianan cu ta sigui, ta pidi e clientenan pa sigui nan website y nan pagina di Facebook, pasobra ta bay cuminsa pone mas informacion detaya di henter e areglo special aki y e ta consehabel pa tur e comerciantenan chikito, cu ta genera un omzet te cu 12 mil florin pa aña. Nan por bin na remarca pa haci uso di e areglo special aki y e ta ancra den ley. E ta stipula den ley. Ta bal la pena cu e cliente por haci uso di dje, pasobra e ora e no tin nodo di paga BBO, BAVP, BAZV durante aña. Tampoco e tin mester di bay entrega un formulario di declaracion tur luna, manera cu ta usual cerca otro comerciantenan.
Dimp tin un bista for di e cifranan cu nan tin den nan datonan, tin rond di 1000 comerciante cu ta cay den e categoria aki, cu tin un negoshi chikito cu ta genera un suma basta minimo durante aña. En todo caso cu ta keda den e cuadro di 12 mil florin of menos. Tipo di negoshinan cu por pensa cu ta genera asina tiki cen pa aña na benta, por ta e personanan cu tin un snack na nan cas y parti mainta nan ta bende djis pastechi, batido etc. Nan no ta genera mucho omzet. Nan volumen di benta ta hopi minimo. Mayoria bes ta hendenan grandi cu nan kier djis haci algo extra y nan no ta mantene un negoshi grandi.
Por ta bo por haya otro hende cu ta bende cualkier otro producto. Por ta bende paña, pero nan ta haci’e un temporada so durante aña, manera durante e temporada di scol of temporada di December, ora cu tin mas volumen di benta. Pero nan no ta activo of mucho activo durante aña.
E tipo di empresa chikito aki ta genera un volumen di benta basta minimo. Den bestand di DIMP por mira cu ta mas of menos un 1000 cliente. Naturalmente e por ta mas, pasobra awor aki cu e areglo special aki, por ta por haya mas comerciante cu ta bin aplica p’e. Esey tin cu wak ainda despues cu caba di duna e formularionan, tin cu wak cuanto ta drenta bek y cuanto exactamente di e cliente, e comerciantenan chikito aki ta bay haci uso di e areglo special aki. Pero siguramente ta algo cu a wordo poni den ley, specialmente pa yuda e comerciantenan, pa minimalisa nan gastonan tambe, segun Pieters.
