Awemainta a aparece un articulo di un mayor preocupa den diferente media. E preocupacion ta tocante e cantidad di herkansing cu Colegio Arubano ta ofrece na e candidatonan pa examen. Den e articulo ta haci un comparacion tambe cu otro scol, sinembargo ta laga mas aspecto afo.
Colegio Arubano ta un scol cu ta pone e interes di e alumnonan na prome luga. Cada decision ta tuma na interes di e alumnonan. Algun aña pasa a dicidi cu ta cuminsa cu e partinan di examen (examenonderdelen) den e klasnan prome cu examenklas. E candidatonan pa examen di Colegio Arubano ta e uniconan di havo/vwo na Aruba cu ta completa e partinan di schoolexamen di e materianan den e klas prome cu examenklas.
Den e klas prome cu examenklas, e alumnonan tin posibilidad di haci maximo dos herkansing. Esaki ta un bentaha hopi grandi compara cu e otro scolnan cu no ta ofrece herkansing. Banda di e herkansingnan den e klas prome cu examenklas, e alumnonan tin dos herkansing den e aña di eindexamen. Esaki ta nifica cu e alumnonan tin maximo cuater herkansing cu nan por haci. E cuestion cu a bin dilanti ta pa ofrece, banda di loke tin caba, un herkansing extra.
Na e otro scolnan e alumno mester scoge directamente despues di e periodo di schoolexamen, ta cua materia e kier haci herkansing di dje. Den pasado Colegio tabata haci esaki tambe. Esaki tabata algo cu e alumnonan mes a pidi pa cambia, pues pa haci tur herkansing despues cu a traha tur schoolexamen, ya asina nan tin miho bista kico nan por scoge pa haci herkansing di dje.
Hopi alumno tabata arepenti di e escogencia cu nan a haci mas prome den e aña. Colegio Arubano ta e unico scol cu ta duna e alumno oportunidad pa scoge cua materia nan kier haci herkansing di dje te despues cu el a traha tur schoolexamen caba. Esaki ta un gran bentaha pa e alumnonan.
Den articulo di e mayor preocupa, ta sugeri cu un extra herkasing ta tuma solamente dos dia. Esaki no ta competamente berdad. Cu e areglonan vigente, nos mester di tres merdia, cu ta encera 8 ora maximo di perdida di les. Cu un extra herkansing, nos lo mester di henter un siman di scol, cu ta encera cu un promedio di mas cu 30 ora lo cay afo. E oranan di les den e fase aki di e aña escolar ta di escencial importancia pa caba cu e matreia pa examen na un manera responsabel y pa train pa examen. Di e manera aki e alumnonan lo ta bon prepara pa examen, cu ta aumenta nan probabilidad pa gradua.
Finalmente, esaki ta na beneficio di e alumnonan.
