E famoso trend di un “TikTok Challenge” riba auto marca Kia keto bay ta un problematica serio riba nos isla. Hopi auto destrui cu gasto cuantioso pa propietario di e autonan aki, cu ta resulta parcialmente daña of completamente destrui despues cu purba deshaci di nan.
Den ora di marduga, habitante preparando den ora trempan di mainta pa bay trabou a hay’e sorprendi ora cu a tuma nota cu su vehiculo, un Kia Rio shinishi (A-55515) no ta para pafo. El a indica cu e anochi prome, el a yega su cas alrededor di 10:30 pm y prome cu 6:00 am e auto no tabatey mas. Esaki a sosode na Alto Vista for di caminda cu a bay cu su vehiculo.
A tuma contacto cu polis y mesora nan a activa y tira bista den diferente bario si acaso ta mira e vehiculo aki. Polis di bario, atento pa cualkier movecion straño a bin topa cu vehiculo bandona den area di Madiki Kavel. Despues di verifica a bin constata cu en berdad ta trata di e vehiculo cu a joyride den ora di marduga na Alto Vista.
Tin un maniobra specifico y un patronchi den tipo di daño na momento cu ta horta e vehiculonan aki den e ‘challenge’, cual ta kibra e switch di e starter, uzo di un USB cu ta conecta na e vehiculo y ta cende esaki pa despues nan subi caya cu ne. Lamentablemente parti di e challenge tambe ta destruccion di e vehiculo, cu hopi ta haci. Nan ta kibra den cura, palo di luz of laga nan destrui atras den mondi.
Investigacion policial ta andando, ta buscando di tur manera pa frena e acto aki entre e hobennan. E ta un competencia entre pariba cu pabou di brug, pa mira ken ta yega na mas hopi vehiculo acumula pero mientras esey ta tuma luga, propietario di cada vehiculo ta esunnan cu ta Sali perhudica y cu gasto grandi pa bay paga.
