Diahuebs den careda di 5’or y mey di atardi, a ricibi informe cu un grupo di hende ta causando destruccion na un adres na Macuarima, unda a tira varios piedra y baranca riba e cas ey.
Mientras varios patruya di polis a cuminsa move pa e adres, esnan cu tabata causando problema na e adres menciona, a subi den un Jeep, anto aparentemente sin permiso di e doño mes, y a huy for di e adres.
Un rato despues a drenta informe cu e Jeep cu varios hende aden, inclusive varios menor di edad, lo a accidenta y a bolter riba caminda na altura di Macuarima 118. Testigonan na sitio a laga sa cu nan a wak e grupo core bay mas pabou. A yega tres ambulance pero no a logra haya esnan herida, debi cu tur a core bay.
Ta un rato despues dos menor di edad a regresa cu algun herida na nan curpa. Segun informe in-oficial, uno cu man kibra y otro cu kap na cabes. Polis a bay na un otro adres mas pabou, esta Macuarima 101-C, unda varios di esnan envolvi a huy sconde. Nan no tabata kier a haya atencion ni di polis ni di ambulance.
Parce cu aki ta trata di un problema bieu cu ta andando basta aña caba, unda e grupo di hoben hunto cu un persona adulto a bay na e adres y a cuminsa bombardia e cas cu baranca. Finalmente Polis a detene 1 persona na e Macuarima 101-C y tambe a confisca un mata di marihuana na dicho cas. Ainda ta buscando un persona mas pa duna cuenta di e actonan cometi. Mientrastanto Polis ta en espera pa wak si e doño di e Jeep accidenta lo bay entrega keho cu nan a bay cu su jeep sin permiso.
