Aunke cu ya Raad van Toezicht voor de Advocatuur a yega di condena dos abogado na e mesun bufete di abogadonan Croes, Wever & Ruiz, toch ta parce cu nan no ta siña. Siendo “huisadvocaat” pa Gabinete Wever-Croes, specificamente pa e companianan estatal cu tabata resorta bou di minister-president den su prome gabinete, ata awo e mesun bufete ta para na un crusada masha fastioso…e biaha aki den e proyecto “Secrets Baby Beach Aruba”.
Recientemente Corte di Prome Instancia a tuma un decision riba un peticion di LAR di dies habitante di Sero Colorado representa pa abogado mr. Maritza Boyce, contra Minister di Infrastructura mr. Evelyn Wever-Croes representa pa mr. V. Emerenciana (DWJZ) y contra e compania Three Rivers Real Estate representa pa abogado mr. Anthony Ruiz.
E caso ta pa hues ordena e compania pa stop cu e trabounan di construccion di Secrets Baby Beach Aruba pendiente un caso den corte. Pero e hues a ripara cu, de facto, e trabounan mester tabata para for di februari 2023 caba! Esey a habri wowo di corte y di tur hende, cu con por ta posibel cu un compania stranhero, Three Rivers Real Estate, cu kier bin haci negoshi na Aruba, ta opta pa deliberadamente no sigui ordo di un hues!
Secrets Baby Beach no ta respeta corte
Basicamente e caso tabata pa pidi hues, via un procedura di LAR, pa para trabounan di construccion na e proyecto situa na Baby Beach. Na final, e magistrado a conclui cu esey no por. No pasobra cu e hotel no a haci nada, sino pasobra cu ya un otro hues a destrui nan permiso di construccion caba desde februari ultimo. Cu nan a sigui despues, manera cu nad’un pasa, ta un muestra di un falt’i respect enorme contra nos sistema hudicial. Como un compania stranhero cu kier inverti y desaroya un hotel na Aruba, e compania Three Rivers Real Estate no ta actuando como un “good corporate citizen”.
Pero ken a faya aki?
Como compania stranhero, probablemente nan lo purba hustifica cu nan no ta sea compronde nos sistema of compronde e idioma Hulandes di cual cartanan oficial y sentencia di hues ta bin aden. Pero, den e caso aki e asunto ta mas complica ainda! Ta resulta cu e compania Three Rivers, cu ta doño di e hotel di 600 camber na Baby Beach, a postula e mesun bufete di abogado Croes, Wever & Ruiz cu nan compania Arulex Trust, como e director. Pues e mesun abogado cu mester conseha e compania riba aspectonan legal, ta e mes ta tuma decision tambe, keda sin respeta sentencia di hues y despues bolbe defende e compania den e caso di LAR. Si esaki no ta conflicto di interes, kico si ta anto?
Ora purba di ta “politically correct”
E reto aki ta cu companianan stranhero cu yega Aruba, ta purba semper pa por asocia nan mes cu un bufete di abogado cu tin “bon entrada” na e gobierno na mando. Claro, siendo tata di e minister cu mester tuma decision riba tereno y permiso di construccion y siendo e bufete cu ta defende gobierno den hopi caso, ta purba pa mesora yega na un “deal” pa e bufete ey representa nan tambe. Asina e inversionista ta sinti su mes sigur y den bon man.
Percepcion: Na e bufete ey nos ta den bon man
Tambe nan ta crea e percepcion, sea cu e abogadonan mes ta dun’e of nan ta pens’e pa nan mes, cu asina nan asuntonan ta keda cla mas lihe. Pero, e locual nan no ta tene na consideracion ta, ora cu DOW of DIP bay contra bo proyecto, na cua banda e bufete di abogado lo para? Of ora cu e bufete yuda bo haya permiso mas facil of cu bo no tin derecho riba dje, con lo atende cu e “bad publicity” ora cu henter un bario lanta contra bo y hues duna nan rason den corte. Ata bo awo cu bo proyecto para, inversion coriendo peliger y e minister mes ta laba man! Ta pesey e pensamento di inversionistanan pa purba di ta “politically correct” na Aruba, awor ta resulta den mas problema cu nada. Kisas miho acesora bo mes cu un bufete di abogado cu conoce ley, cu ta integro (den sentido cu no Raad van Toezicht voor de Advocatuur no a condena nan) y cu tin bon relacion cu e departamentonan di gobierno. Awo a bay purba staciona bo mes den zona sigur, pero a resulta cu bo ta mas den zona di guera contra e pais, cu bo mes lo tabata desea como inversionista.
Conseho of decision robes
Secrets Baby Beach Aruba tin trabou awo pa haci den propio seno. Den caso cu nan no ta para pa e tipo di decisionnan asina, den cual ta bay contra nos sistema legal, anto e ora nan mester tuma un posicion. Keda keto y man crusa no ta un opcion awor, pasobra henter Aruba si ta compronde bon bon con e liñanan comercial-politico-poderoso ta core riba e pida baranca aki. Tur hende sa aki cua bufete di abogado ta liga cu cua partido y gobierno na mando. Pues, ningun hende lo kere cu aki ta trata di un eror, sino mas bien e pensamento di cu “nos ta gobierno” y dal bay numa pasobra ningun departamento lo durf di para e proyecto toch. Ata awo hues a par’e pero a sigui toch, pa cual ta atacha e imagen di Three Rivers Real Estate, den un compania stranhero cu no ta respeta ley na Aruba!
Tocante Secrets Baby Beach Aruba
Tabata na november 2019 cu AMResorts®, un compania di Apple Leisure Group® (ALG), a anuncia un acuerdo nobo pa construccion di 600 camber pa e proyecto Secrets Baby Beach Aruba situa cerca di Baby Beach, na San Nicolas, como parti di e cadena di Secrets® Resorts & Spa. E grupo tras di e proyecto ta Grupo Martinón, estableci na Aruba via e compania Three Rivers Real Estate VBA.
E intencion ta pa traha 600 camber prome, evalua e proyecto y despues amplie cu 300 camber mas! Ora a anuncia e proyecto na november 2019, a bisa cu lo cab’e na final di aña 2021. E proyecto completo ta costa alrededor di 200 miyon dollar Mericano. Pero, pandemia y despues batayanan legal den corte ta haci cu awe na 2023 ainda falta bastante ainda pa por finalisa e hotel gigantesco aki!
E hotel ta destina solamente pa adulto y lo ofrece e concepto conoci como un vakantie exclusivo “Unlimited-Luxury®”, cu ta cubritur e opcionnan di cuminda y servicionan den e hotel, cu ta inclui oferta di cuminda estilo “gourmet a la cart” sin reservacion, servicio di cambernan y roomservice 24 ora pa dia, bebida sin limite, mini bar den camber, actividadnan y entretenimiento nocturno “live”. Y tur e servicio y actividadnan aki ta inclui, pues no mester ni sali cu tas of cartera!
E grupo Apple Leisure Group® (ALG) ta un di e companianan principal di tours, biahe y hospitalidad di Merca. Via su compania AMResorts® nan a desaroya of ta desaroyando proyectonan hotelero grandi den Caribe, manera ta Dreams Curaçao Resort, Spa & Casino y pa no lubida Secrets St. Martin Resort & Spa.
Siendo un compania reconoci como un lider den e mercado di hotelnan “All Inclusive”, awendia AMResorts® ta maneha 66 hotel di e marca aki cu como 9000 camber den pleno desaroyo. E compania ta posee como 24000 camber bou varios marca di hotel na Mexico, den Caribe, Merca y Spaña.
