E aña aki, Fundacion Chico Harms ta celebra e di 13 edicion di “Dia di Brazil” cu un programa di evento durante luna di juli, augustus y september 2023. Ta habri e temporada 2023 cu e mensahe di ‘Brasa bo cultura’, comparti pa Chico Harms na e comunidad di Aruba.
Den cuadro di e celebracion di Dia di Brazil, Aruba Tourism Authority a mira e importancia den uni cu Fundacion Chico Harms pa realisa Dia di Brazil 2023 pa asina por mantene y sigui engrandece nos cultura entre tur generacion.
Por participa na e programa oficial di evento cu ta lo siguiente:
- Dia 29 di juli 2023 pa 7:30 pm: Festival Cantica di Caya na Centro di Bario Brazil.
- Dia 19 di augustus pa 8:00 pm: Fiesta (Batacaso) Tipico na Centro di Bario Brazil.
- Dia 26 di augustus pa 7:00 pm: Lo corona reina cultural categoria di baby te cu gran dama y lo corona e pilar cultural. Un pilar cultural ta un señora cu tin un impacto positivo pa e cultura di Aruba.
- Dia 1 di september 2023 pa 6:30 pm: Parada cu Lanterna lo cuminsa na Centro di Bario Brazil caminda cu tur participante lo cana cu un lanterna den man pa lusa e caminda.
- Dia 2 di september 2023 pa 8:00 pm: Fiesta di Tambu y aniversario di Centro di Bario Brazil. Evento lo tuma luga na Centro di Bario Brazil.
- Dia 3 di september 2023 pa 3:00 pm: Parada Folklore Cultural y Dia di Brazil. E parada lo sali y termina na Centro di Bario Brazil y lo ta compaña pa 10 diferente grupo musical.
A.T.A. ta invita e comunidad di Aruba y bishitante di e isla pa uni y presencia e eventonan aki pa hunto brasa nos cultura.
