No ta mucho ora pasa cu un video a cuminsa bay rond riba rednan social, di un homber ta graba con e ta insulta tres dama, supuestamente trahadonan di departamento di salud, sinta na mesa sin tapaboca bisti. No ta unicamente cu e video a bay rond riba diferente plataforma social, sino cu e mes, Ahrone Erasmus a public’e riba su pagina di Facebook.
Compaña cu e video el a pone un texto cu arsenal di palabra no adecua contra e damanan cu tabata na mesa ta come un fried rice cayente. Erasmus a conta riba su post el a hay’e obliga di cumpra un tapa boca pa 1 florin mirando cu e no tabatin, pa asina por a permitie cumpra cuminda den e restaurant na Bubali. Bo ta obliga di tin un tapa boca bisti. El a bira wak y tabatin algun persona ta saca dede p’e, segun Erasmus.
El a bay pafo, pone su cuminda den auto, kita su tapaboca y bolbe drenta e restaurant y graba e damanan sinta na mesa. E manera con e tabata dirigi su mes na e tres damanan tabata uno, desformal por completo. Erasmus tabata rabia cu e hecho cu; na mesa si por ta sin tapa boca y para den rij pa cumpra cuminda si mester di tapa boca.
Ta un regla cu gobierno di Aruba y Crisis Team a implementa pa hopi tempo caba pero Erasmus no a tuma nota di dje. Durante cu Erasmus tabata graba su video, un otro cliente sinta na mesa a cana bin den su direccion y bis’e cu e no ta acepta cu e ta insulta hende muhe den e forma ey y cu e ta cla pa regla cuenta cu ne. Ahrone Erasmus no a kibra su cabes y a sigui graba y insulta no unicamente e trio pero tur hende den e restaurant.
No a dura mucho, cu awe nochi polis a presenta na un cas na Tanki Leendert pa un caso serio di maltrato. Na yegada, no a topa cu e agresor, pero cu un homber malamente herida y cu basta sla na su cabes. Na sitio a ricibi informacion cu ta trata di e homber popular cu no ta gusta bisti tapa boca y cu a insulta tres dama recien na un restaurant na Bubali. Ken a agredi e homber ta desconoci ainda.
Na final a polis a pidi pa ambulance bin check un cu e otro cu ne mirando cu e tabata keha di basta dolor na su cabes. A transport’e pa hospital caminda lo brind’e atencion medico avansa.
