Dialuna no a habri bon pa doño di e auto marca Mazda color shinishi cu tabata caminda pa trabou. Algo pasa di 7:30 am e chauffeur a perde control riba e vehiculo y a dal den e vangrail pa despues bay para poco mas riba e brug di Green Corridor.
Polis a yega mesora na e sitio y a cera e rotonde di Pos Chikito, mientras un otro unidad a atende cu e accidente mes.
Na e sitio di desgracia, e chauffeur a declara cu un taira di su auto a rementa den careda y cu esey a pone cu el a perde control riba e stuurwiel y consecuentemente a perde control y a bay dal den e vangrail band’i caminda.
E auto mes no por a sigui move riba su mesun forsa, pa cual motibo a solicita un takelwagen pa brinda asistencia. Danki Dios no tabatin herido den e accidente aki, pero e daño material si ta bastante.
Ta haci un apelacion riba automobilistanan pa stuur cu velocidad reduci, pa evita mas accidente. Tambe pa no stuur si ta bou di influencia di alcohol.
