Den presencia di Yvonne Lee, di Departamento di Labor, cu Giancarlo Croes di Centrale Bank, diabierna mainta Central Bureau of Statistics Aruba (CBS) a anuncia ehecucion di Encuesta Laboral 2023.
Desiree Helder, Directora Interino di CBS ta splica cu e Encuesta Laboral aki a cuminsa 15 di september cu un duracion di seis siman, te cu fin di october 2023. Ta bay haci e encuesta aki na hogarnan di Aruba. E hogarnan cu a keda selecciona rond henter Aruba ta bay wordo acerca door di un team di 27 encuestado, y nan ta en total 4,050 adres cu lo bishita.
“T’asina importante pa tene pueblo na altura cu kisas nan hogar lo ricibi bishita, p’asina participa na e encuesta asina importante manera esun aki.” E ta importante pasobra naturalmente informacion relevante, informacion actual riba desaroyonan cu ta tuma luga den mercado laboral di Aruba ta esencial pa tin disponibel. No solamente pa CBS, pero tambe pa diferente instancia manera Departamento di Labor y Centrale Bank, pa nan por tin un bista riba kico ta e desaroyonan den nos mercado laboral.
