Riba e fecha di awe, 6 di november, ta recorda cu 79 aña pasa a fusila Boy Ecury. Boy Ecury a forma parti di e resistencia Hulandes pa bringa contra e invasion Aleman. A gar’e dia 5 di november 1944, unda a interoga y tortura Boy pa informacion.
Albert de Veer, presidente di Albert-Mariaisabel de Veer Foundation, a expresa di ta lamenta cu ningun departamento di gobierno no a haci ningun anuncio pa recorda Boy Ecury. El a indica cu Boy Ecury ta un heroe nacional y e unico Rubiano di tin medaya di resistencia duna p’e monarkia Hulandes.
E fundacion tin como meta pa preserva, promove y cultiva e herencia historico di Boy Ecury. Nan ta haci esey, por ehempel, door di a inverti den embeyecemento y mantencion di Boy Ecury Park, situa net banda di su busto, dilanti di ex-Juliana School.
Otro aña Boy Ecury ta haci 102 aña y e ta spera cu por haci e homenahe cu presencia di marinier, gobernador, e politiconan, tur partido. De Veer ta di pensamento cu esaki ta algo cu no tin color, pero e ta obligacion pa tur Rubiano pa duna honor na ken merece esaki.
De Veer kier, riba e dia di awe, pidi atencion di Gobierno di Aruba pa organisa un homenahe grandi otro aña pa conmemora e di 80 aña cu e Alemannan a fusila Boy Ecury, despues cu el a nenga di traiciona Reino Hulandes. Tambe cu desde e dia ey en adelante por honra e mucha aki cu a sacrifica su mes pa liberacion di Hulanda, Aruba y tur Antias.
A der’e cu tur homenahe militar y su famia a haya condecoracion pa e rol cu Boy a desplega como militar di resistencia Hulandes.
