Tabatin mas o menos 2.500 participante den 35 grupo di carnaval cu a bolter Rotterdam cabes abou e aña aki. Zomercarnaval ta conoci pa ta un explosion di color, musica, fiesta y creatividad den un solo parada yena di carosa. E parada ta cubri un ruta di 5 kilometer largo den cayanan di Rotterdam, den cual e carnavalistanan ta procedente di tur sorto di cultura y nacionalidad. Zomercarnaval ta e “Caribbean streetparty” di mas grandi na Hulanda.
E programa di diasabra riba Coolsingel ta conta cu algun evento cu ta organisa prome, manera por ehempel e Royalty Election, Rueda de Casino, festival di Mercado, un jump-up y varios otro evento mas!
Carnaval at night
Diabierna anochi laat a tuma luga e evento “Zomercarnaval pre-party” na Maassilo. E evento a start diabierna anochi pa 11:00 pm y a caba te diasabra 6:00 am. E evento ta conoci pa su cuater areanan, esta Soca vs Dancehall, Caribang, Curadise y e Food Village.
E banda di Aruba, Buleria, tambe a participa den e evento di diabierna anochi den Maassilo. Nan a toca mano a mano cu Gentz y Cache Royale. A conta mas o menos 1200 hende den nan seccion, cu tabata yama “Crazy Loco Loco Jump In”. Ta bon pa menciona cu e cancionnan cu mas a destaca y a ricibi mas aplauso tabata “Savaneta” di Jeon huntu cu Buleria, “Ta mi hendenan” di Chendell cu Buleria y sin lubida e sorpresa pa tur presente, esta e presentacion na final di e medley di carnaval di Claudius Philips hunto cu Buleria.
Buleria den parada
E dos bandanan Buleria y Gentz a toca hunto pa e grupo “Shaira Look Precious”. E grupo ta consisti di 112 miembro y ta existi pa tres aña caba. Den parada di diasabra nan tabatin 300 participante. Esaki ta di dos biaha cu Buleria ta toca durante Zomercarnaval. Prome biaha cu nan a participa tabata na aña 2020. Buleria a presenta cu orkesta completo cu mas o menos 25 musico, incluyendo Claudius Philips como cantante invita.
Tocante Buleria
Dwight Leoneta a funda e banda Buleria na aña 2014, pues otro aña ta celebra nan di dies aniversario. E banda a produci varios cancion cu a bira hit grandi, tanto na Aruba mes como den Reino Hulandes. A gana varios premio di banda di aña y a gana varios festival, por ehempel e Festival di Tumba.
Tocante Claudius Philips
Claudius Philips ta un compositor, areglista, pianista, cantante, productor y un entertainer. Na aña 1983 a coron’e como Rey di Calypso pa prome bes, cu su calypso “The Surprise”, cu a dun’e un boost den su carera musical.
