Diabierna, 5 di april, Arumil cu ta e division militar Arubiano di Marinierskazerne (MSK) lo tin un celebracion pa recorda nan 27 di aña di existencia cu un tremendo celebracion riba tereno di ex-Bushiri hotel, a combersa cu varios miembro cu ta forma parti di e comision organisado pa e celebracion aki.
Carlos Buera, Adjudant Arubaanse Mariniers, a conta un poco e historia di Arumil cu a cuminsa na momento cu Aruba a haya su Status Aparte na 1986 cu a conoce e separacion di Antias Hulandes. For di 1986 nos isla a conoce su propio cuerpo di marina y servicio militar obligatorio (dienstplicht) na momento cu un hoben masculino cumpli diesocho aña, tawata tin algun excepcion riba e obligacion aki. Riba 7 di april 1997 a aboli e obligacion di servicio militar na momento cu un hoben masculino cumpli diesocho aña, lagando espacio pa un hoben drenta di forma boluntario na Marinierskazerne.
Na 2024 lo cumpli 27 aña cu ta recorda e fecha importante cu aboli e obligacion , pero lo ta celebrando e fecha e aña aki riba 5 di april. Buera a splica pa conmemora e fecha aki, parti mainta lo tin ceremonia cu lo tuma luga na e base militar di Marinierskazerne na Savaneta, unda cu a invita algun director di diferente unidad cu lo haci acto di presencia.
Mario Briezen, Seargeant-majoor y alabes ta forma parti e comision encarga cu e evento festivo, a splica como parti di e celebracion lo ta un dia deportivo riba tereno di ex-Bushiri hotel cuminsando pa 1:00 di merdia. Publico ta bon bini pa por bin presencia e evento pa por wak e competencianan deportivo cu lo tuma luga entre e departamentonan encarga cu siguridad manera KPA, Kustwacht, KIA, CEA y algun otro instancia. E expectativa pa e competencia entre e departamentonan ta halto.
Daniel Vrolijk, Luitenant Arubaanse Mariniers, a splica cu Arumil completo ta yudando y otro departamentonan tambe ta sostene e evento aki manera: Rode Kruis, CMO y DOW. Companianan comercial a duna nan aporte y alabes ta gradici Elite Production cu generator di electricidad pa e evento.
Na final Vrolijk a menciona “E competencia lo bay ta heavy y lo ta pa trece pueblo cerca nos, pa por wak kico tur e partnernan den siguridad por haci y con ta competi cu otro.”
Tocante Marinierskazerne
Como parti di Reino den Caribe tin aproximadamente 800 militar, como tambe personal civil di defensa staciona na e islanan di Aruba, Corsou y Sint Maarten. Nan presencia na e islanan den Caribe tin tres cargo importante cu nan mester ehecuta: Defensa di teritorio di Reino Hulandes – Stabilidad y Estado di Derecho – Apoyo na autoridad local.
Tocante Arumil
Militar Arubiano di Marinierskazerne (MSK) tin e division di Arumil. Despues di Status Aparte, Aruba a haya su propio Cuerpo di Marina y servicio militar obligatorio. Dia 7 di april 1997 a kita e obligacion pa forma parti di servicio militar, unda un hoben masculino mester drenta cu su diesocho aña.
Awendia esun cu kier forma parti di Arumil por haci esaki boluntariamente. Arumil ta consisti di 63 miembro.
