Ma tuma nota cu tin un video di Miguel Mansur circulando y a “sponsor” riba Facebook, den cual e ta hibando su “betoog” den Parlamento y ta declara cu gobierno a duna permiso pa traha cinco mil camber mas aki na Aruba. Ta parce cu Mansur desespera pa voto awor kier pinta gobierno scur, y kier “uza” e topico di “no more hotels” cueste loke cueste pa manipula pueblo na su fabor. Pa desenmascara e mentiranan di Miguel Mansur mi lo uza e pruebanan concreto y documentonan pa demostra un biaha mas cu e ta un calumniador “eerste klas.”
ATA a bin duna un presentacion na Parlamento
· Riba 15 di Februari 2024, ATA a bin na Parlamento di Aruba y a duna un presentacion di su Corporate Plan. Den e presentacion aki por a wak cu e gobierno actual a reduci e cantidad di compromiso di camber for di 7.000 te na 1.971 pa 2025. Despues di 2025-2030 esaki lo ta 1.357. Ainda mi ta rasca mi cabes puntrando mi mes for di unda Mansur a inventa cu lo bay construi 5.000 camber mas na Aruba. Ken te gañado awo?
· E informacion aki riba a keda confirma traves di contestacion cu mi a ricibi di minister Dangui Oduber na mi preguntanan di “No More Hotels” cu ma publica algun siman pasa. E contestacion riba mi preguntanan a drenta Parlamento 14 di februari 2024 y ta un documento publico na cual tur parlamentario tin acceso. Mansur tin acceso na esakinan! ATA y gobierno ta papiando e mesun idioma y ta comparti e mesun informacion cu mi tin. Kiermen, ken ta e gañado?
ROPV ta splica e asunto di “No More Hotels” claramente.
· Riba e www.DIP.aw por haya e documento riba e tema aki y riba e ROP y ROPV. Na punto 2.9.2 di e documento ta mustra claramente cu:
· Riba 1 di December 2018 e Minister di Ruimtelijke Ontwikkeling, Infrastructuur en Milieu a pone un moratorium riba hotel y condominiumnan nobo. Kiermen, gobierno a dicidi caba na 2018: “No More Hotels!”
· No lo duna mas erfpachtrecht pa proyecto di hotel, excepto esunnan cu tabata duna prome cu 2017 pa gobierno di AVP y cual contract ta dificil pa cancela.
· Tin un excepcion pa Secrets y pa construi algun boutique hotels pe centro di San Nicolas y Oranjestad pa asina subi e fluho di cliente y turista y revitalisa caya principal di ambos ciudad.
· Punto 2.5.3 ta subraya lo siguiente: Den e añanan prome cu 2017 e peticionnan tabata entrega na Gobierno di AVP pa construi mas di 7.000 camber di hotel.
· Segun ROPV por construi te cu 2.400 camber entre 2020-2025. Sinembargo a opta pa reduci esaki na 2.000 camber. Con esaki a sucede?
· Di 7.000 camber 2.000 tabata acorda via e acuerdonan verbal. Esakinan por tabata cancela mesora segun e ROP 2019, cual a sucede tambe.
· Di 5.000 (7.000-2.000) camber cu a resta, 1.672 a haya e “optie pa erfpacht” pero no a logra e criterianan necesario. P’esey e “optieverlening” no tabata extendi. Esaki a baha e cantidad di camber e ora pa 3.328 (5000-1672).
· Pa mantene e cantidad cerca di 2.000 camber a opta pa schuif a cantidad di 1.357 camber despues di 2025. E doñonan di e proyectonan a wordo notifica di esaki. Den e ROPV e 1.971 cambernan restante (3.328-1.357) tin e siguiente destinacion: (1) 991 camber turistico pa “Westkust,” (2) 680 camber turistico pa “Oostkust,” (3) Havenfront Oranjestad 200 camber, Centro di San Nicolas y Oranjestad cu 100 camber mas. Ken te gañado awo? Ya bo sa!
Mansur, bo mentiranan continuo, bo comportacion emocional instabil, bo arogancia y atakenan baho contra bo contrincantenan ta bisto. Pero conta cu mi pa desenmascara bo cada bes cu bo sali pa gaña pueblo. Hunto cu e publicacion mi ta encera tur e documentonan di prueba di kico mi ta splicando den e articulo. Por haya nan tambe riba mi Facebook: Marco Berlis Oficial.
