Awe tardi, si tur cos ta bon, Banco di Seguro Social, SVb, a transferi mas di 48 miyon florin pa paga subsidio di salario na companianan cu a solicita pa e ayudo aki. Ta trata aki di companianan cu a bin haya nan mes den problema financiero serio debi na Covid-19 y e crisis economico cu a bin su tras. E suma di 48 miyon florin ta dobel di locual cu SVb ta paga na pensioen tur luna!
Na tur tin 3974 compania inscribi na SVb, pues cu tin trahado den servicio y cu ta sigura nan trahadonan. Di e cantidad aki, a aproba pa paga 1645 compania pa subsidio di salario, cu lo bay pa cubri un maximo di 60% di salario di 28.122 trahado, cu atrobe ta mita di e forsa laboral di nos pais.
Kico ta e diferencia entre 3974 pa 1645, ta pasobra cu of e compania no ta bin na remarca pasobra no ta cumpli cu e rekisitonan of nan no a solicita pa dicho ayudo financiero.
Ta bon pa splica cu companianan cu no tin ningun sorto di entrada, ta cobra un maximo di 60% di e subsidio di salario. Gobierno ta sali for di e punto di bista cu cu e negoshi mes ta aporta cu 20% y e trahadonan ta entrega 20% di nan entrada pa toch nan por bay cas cu 80% di salario. Pero, den caso cu e compania no a perde henter su entrada, e ora e lo haya e porcentahe di locual cu el a perde, den e 60% cu ta e maximo. Pues si bo entradanan a cay cu 50%, lo Bo haya 50% di 60% di bo payroll.
Cu si esaki ta suficiente pa wanta companianan viabel y evita retiro masal di trahadonan, ta un cuestion cu ta tempo so lo por demostra.
