S.V. La Fama ta feliz di ta organisando un biaha mas “Copa Puppy Diaz’, honrando e gran futbolista Sr. Paul J. “Puppy” Diaz (qepd). Gran pilar tras di Liga Puppy, Liga infantil di SV La Fama funda na 2005.
For di mainta 8.30 por presencia e prome 2 weganan. Ta hunga ultimo wega pa 7.30 di anochi, p’asina clausura e evento aki cu “Songo Band” te 12 or di anochi.
Un total di 7 club ta formando parti di e Copa aki dividi den 5 liga: U9 – Estrella, Unistars, San Luis & La Fama;
U11 – Estrella, San Luis, Nacional & La Fama.
U13 – Nacional, Estrella, RCA & La Fama
U15 – Unistars, Estrella, RCA & La Fama
U17 – Britania, RCA, Estrella & La Fama
Por bishita SV La Fama su facebook pa schedule di cada liga y cualkier informacion. Sigur bar y cushina lo ta surti pa un y tur.
Den nomber di directiva y comision de SV La Fama, ta warda Aruba completo y specialmente e bario di Savaneta bin celebra y recorda Sr. Puppy”. Ban Brinda Deporte y nos hubentud e sosten.
HISTORIA
Paul J. “Puppy” Diaz – Portero
Den campeonatonan local
Puppy a cuminsa hunga pa La Fama na cuminsamento di añanan 50. For di 1956 te cu 1958 Puppy a hunga tres campeonato den Hoofdklasse pa La Fama. Despues cu La Fama a degrada el a hunga dos campeonato den A-Klasse.
Despues Puppy a bolbe hunga den Hoofdklasse, na 1961 pa Aruba Jrs., 1962/63 pa Estrella y for di 1963/64 te cu 1965/66 pa Tropical.
Despues el a hunga di 1966 te cu 1969 pa R.C.A. Cu R.C.A. Puppy a bira un biaha campeon di Aruba. Tambe el a titula 2 biaha subcampeon, cu Tropical y cu R.C.A.
Cu seleccion di Aruba
Na juli 1955 Puppy a debuta den e seleccion Arubano contra Corsou. Na augustus 1955 e tambe a forma parti di e seleccion di Aruba cu a hunga na Honduras den e campeonato di Confederación Centroamericano y del Caribe de Futbol (C.C.C.F.). Cu e seleccion di Aruba Puppy a hunga contra clubnan grandi cu tawata bishita nos isla, p.e. di Brasil Bon Suceso, Bangú, Fluminense y America. Di Argentina Ferrocarril Oeste, Cerro Porteño di Paraguay y Arsenal di Inglatera. Na october 1968 el a hunga su ultimo wega pa e seleccion di Aruba contra Corsou. Den total Puppy a hunga por lo menos 36 biaha pa e seleccion di nos isla.
Cu seleccion di Antias Hulandes
Na 1958 Puppy a hunga su prome wega pa e seleccion di Antias Hulandes den un wega amistoso contra Deportivo Portugues di Caracas.
Na januari 1959 el a gana medaya di plata den e Weganan Centroamericano y di Caribe na Caracas. E mesun aña aki el a hunga contra Surinam un wega di clasificacion pa e Weganan Olimpico 1960 na Roma.
Na februari 1960 el a hunga pa Antias cu a keda na di dos luga den e campeonato di C.C.C.F. na Habana, Cuba. Na 1961 el a hunga na Costa Rica den otro campeonato di C.C.C.F. Na 1962 el a hunga cu e seleccion Antiano cu a bishita Hulanda y Dinamarca. Cu Antias el a hunga tambe weganan di clasificacion pa e mundialnan di Chile 1962, Inglatera 1966 y Mexico 1970. Na 1965 el a hunga na Guatemala den e di dos campeonato organisa pa Concacaf. Na 1966 el a bolbe gana medaya di plata den e Weganan Centroamericano y di Caribe na Puerto Rico. Pa e seleccion Antiano Puppy a hunga por lo menos 42 biaha.
(Information: Fico Vrolijk)
