Tur cos a cuminsa cu gritamento y agresion. E no ta un adres desconoci pa polis. Shiribana 9, un adres cu polis di bishita semanalmente, sea pa benta di droga, bringamento of robo. Awe no tabata un excepcion; a bati alarma mas o menos 3:25 pm pa un pelea formal dilanti di e cas, pa djey un van marca Mitsubishi ranca sali c’un persona direccion pabou.
A kere cu ta secuestro, pa cual polis a activa mesora. No un ni dos, sino como cinco patruya di diferente districto a presenta na e sitio pa salba e señora for di e secuestrado. Sinembargo, ora a papia cu e señora, a resulta cu e storia ta un poco diferente.
A start un buskeda pa e van y a logra par’e cerca di e dam na Boegoeroei. Tabatin dos ser femenino den e van. E chauffeur a conta cu; no ta trata di sucuestro sino mas bien cu ta yuda e ta yudando e señora.
E señora ta biba den un situacion hopi malo. E homber ta maltrat’e tur dia; ta hunta pica riba su curpa y no ta lag’e sali for di cas. Esun cu tabata core e van tambe ta un conoci di nan. El a gaña e homber cu e t’ey hiba e señora cumpra paña pa e por logra sac’e fo’i cas y hib’e na Warda di Polis. E tabata direccion pa ward’i polis na Shaba.
Polis no por a haci mucho mirando cu no tin un keho oficial entrega. A conseha e victima pa bay warda di polis pa haci un denuncia oficial y di biaha pa pidi nan pa un cel mirando cu e tabata intoxica.
Probablemente recherche lo mester tuma e caso aki over, di cual un abusado ta maltrata e dama ki ora e haya ta bon. Di otro banda, e seccion social (slachtoffer hulp) lo mester purba brinda poco guia na e victima den con e por cuminsa un bida nobo, sin mester wanta maltrato di ningun homber.
Ta un situacion cu polis ta topa tur dia. Hopi problema social den comunidad, mientras ta scucha masha poco kico Departamento di Asunto Social ta haci pa yuda e victimanan. Durante e supuesto crisis social, a aloca miyones na fondo pa por maneha e tipo di retonan social asina pero ningun hende ta mira unda e placa a bay ni cuanto victima nan a yuda.
Ta teme cu den e dianan di fiesta, unda ciudadanonan ta liber na cas, cu victimanan lo tin nan abusado mas largo den cas cu nan pa sigui maltrata y abusa di nan. Ta importante pa precisamente den e dianan aki tin atencion special, pero DAS ta liber desde dia 22 pa dia 27 di december y a pasa tur problema pa e grupo di algun trahado social den Cuerpo Policial Aruba pa carga tur problema social di nos isla.
