Cu sosten di su clientenan, Super Food Plaza Cares Program a haci entrega di otro donacion na Fundacion Pa Nos Comunidad. E donacion tabata den forma di un container di 40 pia yen di comestibles y productonan higienico pa famianan den necesidad. Cu e donacion aki, un biaha mas casi 800 famia por ricibi un pakete completo di comestibles.
Tabata presente pa e ocacion aki directora di FPNC Sra. Gianaika van der Biezen, Sr. Rudy Richardson, marketing manager di Super Food Plaza, Sr. Bryan Krosendijk di CEDE Aruba como tambe Sr. Kenneth Geerman di GP Cargo. Super Food Plaza kier a gradici di curazon tur su clientenan pa nan donacion den e ultimo lunanan. Aunke e situacion local ta dificil, toch hopi cliente ta sigui coopera pa yuda esnan den mas necesidad. Tambe kier gradici Jumbo, GLE Caribbean y GP Cargo pa nan cooperacion y sin lubida tur e voluntarionan tambe cu a yuda descarga e container.
Bo tambe kier yuda famianan den necesidad? Bo por haci un donacion di cumindanan paketa, poniendo nan ariba e mesa destina pa esaki na Super Food Plaza. Tambe bo por haci un donacion financiero na cualkier kassa di e supermercado y e transaction aki lo aparece ariba bo recibo.
Cu bo donacion di Afl. 1.75 of mas bo por participa pa gana un di e 5 premionan mensual. Tur donacion, grandi of chikito, ta bon bini. Bo por ta sigur cu bo donacion lo yega na esnan cu tin mas mester di dje den nos comunidad. Tur donacion ricibi ta keda supervisa pa CEDE Aruba. Super Food Plaza Cares Program ta sigui haci tur esfuerzo den e temporada dificil aki pa yuda esnan den mas necesidad pa pone cuminda ariba mesa. Un danki na tur esnan cu ta yuda sostene e programa aki y ban sigui traha positivamente pa hiba Aruba padilanti.
