Den conexion cu fin di aña, Stichting Ambiente Feliz ta preparando nan siguiente evento pa recauda fondo. Esaki ta un Christmas Food Drive pa tuma luga dia 3 di december proximo cu ta Dia Internacional pa Persona cu Limitacion. Di e manera aki kier duna atencion riba e fecha ya cu esey ta e grupo cu ta traha cu ne desde 1986.
E food drive ta bay ta na nan localidad na Santa Cruz yama Cas Curason. Hopi hende conoce como e cas geel dilanti di Huchada. Aki comunidad tin e oportunidad di aporta na un bon causa cu ta e clientenan, door di trece sea un pak’i aros of por ta otro producto cu nos tur ta uza na cas. Esaki ta e prome food drive, pa cual ta hopi entusiasma y ta spera cu, cu e cooperacion di comunidad, lo ta un exito grandi.
Por pasa dia 3 di december entre 9’or di mainta pa 3’or di atardi. Por wak mas informacion na e pagina di Facebook di Stichting Ambiente Feliz. Aki tambe tin un lista di e productonan cu ta recomenda pa regala. Ta conseha tur hende pa cada bes cu ta bay haci un compras, cumpra algo extra pensando riba e food drive di Stichting Ambiente Feliz. Tambe ta bon pa cumpra producto cu tin un fecha di caducacion largo.
E dia aki Marlene Van Der Linde ta bin canta un ora pa e actividad, for di 10’or di mainta. Tambe ta bay tin cooperacion di grupo di gaita Mama Rosa cu ta bin merdia 3or y durante henter ora lo tin un DJ pa entretene y anima. Organisado ta pendiente di mas grupo y artista cu kier apoya e bon causa aki. Por tuma contacto na telefon 585-8738 of personalmente na e sede na Santa Cruz of na San Nicolas. Si ta dificil pa yega cerca nan, tambe por avisa y ta dispuesto pa coordina un hende pa bin busca e donacion na cas of compania.
Ta invita tur hende pa Like e pagina y conoce mas di e fundacion. Tambe ta indica e number di cuenta di banco pa esunnan cu kisas kier opta pa contribui cu cualkier suma cu ta na nan capacidad. Lukee Croes, beleidsmedewerker na Stichting Ambiente Feliz a enfatisa cu e evento ta hopi importante pa nan. E ta yuda nan yega na loke nan tin mester pa nan cliente cu limitacion. Ta conta riba e comunidad.