Sv Britannia hunto cu Aruba Soccer Academy, Brazil Jrs y Academia Deportivo Vinotinto di Venezuela ta organisando un torneo di futbol den e categoria U15 di 1 te cu 5 di November, di cual ultimo dia e final lo tuma lugar.
U15 ta mihor conosi na Aruba como e categoria di Menor, naci na 2002 – 2003. Kaarchinan lo wordo bendi na balor di Afl 3 pa adulto y Afl 1 pa mucha te cu 12 aña. Tur entrada di e torneo lo wordo recauda como donacion pa Fundacion Autismo, y tur wega lo tuma lugar den Centro Deportivo Franklyn Bareno (CDFB). Prome cu cada wega lo tin un wega di exhibicion di Lifida di ASA contra Britannia den categorianan U11, U9 y U7.
Tambe Brazil Jrs ta conta cu refuerso di La Fama y RCS durante e torneo. Sv Britannia, hunto cu e sponsornan cu ta hasi e torneo aki posibel, esta AVB, De Palm Tours y Bright Bakery kier invita henter Aruba pa forma parti di e torneo aki, y asina aporta na Fundacion Autismo y alabes tambe na desaroyo di futbol na Aruba. Pa mas informacion por tuma contacto cu Eddie Berg na 593-6720 of email [email protected]
