Ya caba for di momento cu partidonan a cuminsa topa otro pa formacion di Gobierno, nan prome expresion tabata cu Aruba su situacion ta hopi malo. Tur loke nan bisa ta cay mas of menos den direccion di minister di Finansas. No sa cu ki meta nan ta hacie y si ta berdad. Minister di finansas, Angel Bermudez, a splica cu mester ta realistico y nos memoria mester keda fresco tambe. Na 2014, ora cu el a wordo yama pa duna un contribucion den e situacion di nos finansas publico, e situacion no tabata di canta Macamba. Loke cu a purba en todo caso na prome instancia ta, pa para e desaroyo cu tabata tin cu e debe nacional cu tabata creciendo ultimo 25 te cu awor aki, 30 aña, esey a logra. Si mira den raportahenan di CFT, e debenan cu el a haya na 80 pa 83% no a aumenta e ultimo 3 aña.
Tambe, reduci e crecemento, en todo caso den e deficitnan, pasobra e fiansa cu tin cu cumpli cada biaha pa cubri e deficitnan, ta pone cu e debe ta crece, pasobra tin cu fia pa cubri e deficitnan. E ora tin cu cuminsa reduci e deficitnan, pa asina para e crecemento di e debe nacional. Esey tambe a logra den e circunstancia cu nan ta aden. Esey tabata e normanan cu a wordo introduci den ley di LAFT cu CFT ta supervisa. Manera cu por lesa tur caminda, a cumpli cu e norma di 2015 y tambe 2016 y tambe por cumpli cu e norma di 2017. Ta pasonan cu a wordo tuma pa asina ey cambia e desaroyo di e rumbo di finansas publico, unda cu cierto momento ta establece na un nivel cu ta halto ainda. Esey ta berdad, pero en todo caso cu no ta sigui aumenta y for di eynan e ora, ta bay traha riba e presupuestonan pa asina ey por cuminsa yega na surplusnan den e presupuestonan. Esey e ora ta duna e espacio pa por cuminsa reduci e debe nacional. Cu otro palabra, e situacion no ta floria y esey nunca e minister a trece dilanti. Semper el a bisa cu e situacion no ta di canta Macamba, pero si a logra di para e desaroyo negativo cu e tabata aden y pa asina ey, na e momentonan aki por bisa cu ta bayendo na un situacion caminda cu den e añanan venidero tin surplus den e presupuestonan. E reapertura di e refineria lo a yuda esey grandemente, hunto cu e desaroyonan positivo cu den e aña aki ta mirando den nos turismo, pa asina ey e GDP tambe sigui crece. Den 2015 y 2016 no a crece. Tabata tin un crimp den e crecemento economico, negativo y eseynan tin cu pasa aden. El a bisa cu tambe tabata e motibo cu no kier bin cu aumento den impuesto, pero mas bien tabata wak unda cu por tabata tin entradanan incidental entre otro di e settlement di Valero, pa asina mantene e forsa di compra di nos economia, sin cu ta bay eroda esey cu impuestonan nobo.
Na e mesun momento tambe, e minister ta haya cu no por introduci impuestonan nobo. Tin asina un cobransa grandi den comunidad cu tin cu cumpli cun’e. Tabata 2.2 biyon 3 aña pasa. Awo ta 1.5 biyon. Ya caba a kita un kwart for di dje. No por elimin’e tampoco den un solo tiro, e ora ta kraak e economia si saca 2.2 biyon for di e economia den un solo tiro. E tabata e ultimo añanan, tabata un poco acrobacia financiero, pero semper di un banda manteniendo e forsa di compra den nos comunidad y di un otro banda toch, pa cambia e ruta di e desaroyo cu finansas publico tabata tumando. Cu na e momentonan aki, keto bay ta riba e trayectoria cu mester sigui cu e maneho ey di domina e gastonan y purba di optimalisa e entradanan mas tanto posibel, pa asina yega y manera ta para den ley di LAFT, cu ta yega na un surplus den e presupuestonan, cu ta bay e ora ey duna e alivio cu por cuminsa reduci bo debe nacional y cu esey e ora ta bay reduci e gastonan di interes cu ta paga riba e debe nacional.
