Ultimo simannan e ola di criminalidad y e nivel di agresividad cu e ta bin cu ne ta sin prescedente. Mientras cu ainda no ta sinti cu ni Ministerio di Husticia ni tampoco Ministerio Publico ta contestando cu man duro, tur dia e criminalnan ta sigui “score”. Awe marduga a comete un intento di asesinato contra un polis. E polis ta den sala di operacion awo na hospital, caminda specialistanan ta opera su man debi na e lesion ricibi.
Tabata pa mas o menos 1:00 am cu un patruya di polis a para un auto pa un control rutinario riba e caminda grandi di Boegoeroei cerca di Sherwin Williams. Ta trata aki di un auto marca Toyota modelo Tercel color berde, numera A-34229. Tras di stuur tabata sinta e conoci di husticia, Jonathan Amaya. E polis a pidie pa su documentonan y e no a aprecia.
Parce cu aki a start un discusion y den e intercambio di palabra, e sospechoso a gara e polis na su brasa y a dera trot bay. Consecuentemente el a lastra e polis un bon pida riba caminda y despues a los e y lag’e cay riba caminda.
Despues di a comete e acto aki, e homber a sigui core cu velocidad halto y a perde den e cayanan di Boegoeroei.
E polis a keda seriamente herida atras cu brasa kibra y yen di otro herida mas. E tabata sclama di dolor na e sitio. Ambulance a yega mesora pa brinda asistencia mientras patruyanan a activa di tur districto pa yuda nan colega y pa busca e sospechoso.
Un rato despues a localisa e auto no mucho leu di eybanda.
Pero, obviamente, e chauffeur no tabata den e auto mas y a scapa. Cerca di e auto a topa cu un revolver tambe benta cant’i caminda. Aunke ta sospecha cu e arma ta di Amaya, esey polis forensico lo mester confirma ainda via testnan moderno cu ta disponibel awendia.
A start un buskeda masal den e districto di Noord y vecindario. Varios ekipo di polis a activa den marduga, pero e sospechoso a sconde bon scondi, evitando cu por a yega na dj’e.
Siman pasa ainda Sindicato di Polis a anuncia cu ta nota cu agresividad ta aumentando bou di hobennan den comunidad. A bisa cu Mando Policial ta trahando riba plan pa bin cu listramento preventivo, etc. Pero, parce tur hende a drumi, Minister a biaha atrobe y a laga e decisionnan den lachi. Tur hende tabata sa cu ta bin un fin di siman largo, den fin di luna y cu clubnan nocturno nobo habriendo. Mas husticia descansa, mas e criminalnan ta sigui labora. Tene cuenta cu keda sin frena e ola di criminalidad aki cu man duro, lo por costa bida di hende, entre otro di polis mes.
