Pieterboer Kleuterschool a ricibi bishita di minister di enseñansa, dr. Rudy Lampe. Cabesante di e scol, Sonia Gerardus-Goedhoop, a splica cu e ta contento cu e minister a presenta na e scol y cu a bay papia riba diferente punto, cualnan ta hopi importante cu scol kier a trece dilanti na mehoracion den e casonan manera un caso lamentabel cu a sosode.
Nada no ta pasa por nada, e ta menciona, pa con duro e ta den bida. For di tur cos tin cu siña. No ta e momento pa busca culpabel e cabesante a splica, pero ta e momento pa duna e atencion na unda por tin miho proteccion pa e muchanan, pero tambe miho proteccion pa e adultonan cu ta mayor. Pasobra e mayornan ta esunnan cu ta proteha nan yiu.
Na scol tambe ta duna nan parti. Pero ta un momento pa para keto y pa realisa con importante e ta pa nos tin mayornan stabil, pasobra eseynan ta esunnan cu por determina muchanan nan futuro.
E cabesante a sigui splica cu e ta spera cu e bishita por trece un cambio caminda cu por tin buraconan chikito cu cos por bay robes, pa eseynan no ta e motibo pa costa bida di ningun mucha mas.
Cambio den conducta
Gerardus-Goedhoop a cumpli 30 aña den enseñansa preparatorio y tin hopi cambio den e comportacion di mayornan. Tin hopi mayor hopi hoben. Ta ripara cu hopi mayor ta keda sin bin scol, e interes. Tin hopi cu tin interes, pero e mayoria no ta mustra e interes, no pasobra nan no kier, pero pasobra nan mes ta den situacionnan cu ta tene nan cu nan no lo por ta e mayor cu nan lo mester ta pa nan yiu. Nos mester bira un comunidad cu ta duna oportunidad pa nos mayornan tin mas guia, vooral nos mayornan cu ta hoben. Nan ta hopi, nan ta pensa diferente, nan ta gewoon diferente y nan no ta mayornan pa bo bay bisa, wak diferente of culpanan. Ta nan tempo. Pero ta nos mester sa con pa duna nan e yudansa den nan forma di tempo cu nan ta. No por bay bek cu nan. No ta biba den e 30 aña pasa. Nos ta 30 aña mas leu y e mester bira un realidad cu mester bay wak con ta pak aan tur e mayornan cu ta hoben y cu tur e problemanan cu nan tin.
Amiguitonan
E noticia aki tur hende, grandi y chikito sa di dje. Pa e muchanan sigur, nan ta inocente y ta reacciona. Ta contanan cu e mucha no tey mas, cu el a muri. Kico ta morto pa un mucha. Goedhoop ta gradicido cu un mucha toch ta na un edad cu e por keda demostra un alegria den bida y pa e mucha ta e ehempel pa nos tambe cu no obstante kico pasa den bida, e alegria mester keda pasobra nos tin cu sigui. Pero nos mester sigui cu mehoracion. E muchanan ta tristo. Nan sa cu nan a perde un amiguito, pero e muchanan lo ta nos forsa y lo demostra cu no mester keda para y cu bida tin cu sigui. Door cu ta sigui pa nan, lo bay haci e diferencia, Goedhoop a bisa por ultimo.
