Eric Ras, lider di partido CURPA ta reacciona. Nos di partido Curpa por a lesa den medio di prensa cu Accion21 a laga haci un sondeo den pueblo di Aruba pa aprobacion di matrimonio di mesun sexo. E sondeo no ta representa ni 1% di e poblacion.
Por confia e sondeo aki? E ta na beneficio di ken e ta? Nos isla di Aruba den su gran mayoria ta di fe Cristian y pa hopi aña nos pueblo di Aruba ta biba respeta y honra leynan di Dios. Awor hende a dicidi di kier cambia ley pa hustifica su manera di biba cu ta contra leynan di Dios. Den futuro tambe por bin un organisacion cu sondeo pa legalisa ladronicia o legalisa pedofilia cu tambe ta contra leynan di Dios. Tur pais cu bay contra Dios awe ta biba consequencia di nan erornan. For di 2001, cu e matrimonio di mesun sexo a wordo introduci un promedio di 4% ta consisti di matrimonio mesun sexo ta casa y tur aña ta baha. E idea tras di esaki ta pa caba e matrimonio institui pa Dios y caba cu e famia. Tur parti mundo e ta un minoria. Kiko tin tras di e cos aki ta simpelmente placa. Despues di orguyo ta bin caida.
Locual cu nos no mester perde for di bista cu aprobacion di matrimonio di mesun sexo ta bay man den man cu cambionan den nos norma y balornan cu lo bay tin mas consecuencia. Na otro paisnan mayornan ta perde custodia di nan yuinan. Kier introduci e topico specifico aki na scolnan, loke lo trese confucion den un mucha pa asina expande nan locura. Por mira e mesun cos cu esnan cu ta bende droga cu tur dia ta busca muchanan inocente pa cay den adiccion pa asina nan haya mas cliente. E cos aki ta simpelmente diabolico y no tin nada bon den dje. E pueblo di Aruba pa hopi aña tabata den harmonia cu otro. Nos problemanan social no tabata grandi paso e pueblo di Aruba tabata honra Dios. Ora un pueblo saca leynan di Dios for di su bida, locual cu lo spera nan ta sufrimento y tur tipo di malesa y en bez di prosperidad lo bin miseria.
Matrimonio di mesun sexo a cuminsa 8 di September 2016. A trese amienda pa cambia e nomber di matrimonio di mesun sexo pa geregistreerd partnerschap. E amienda aki a wordo accepta cu 11 voto na fabor. A laga nos codigo civil drumi pa un tempo largo y dia 1 maart 2021 a presenta e ley aki den Parlamento caminda 17 voto a vota na fabor y 4 contra. E mesun luna cu tabata tin e votacion pa e introduccion di nos Codigo Civil den mesun luna gobierno a bay cas. Awe nos por mira cu 2 di e parlamentarionan di avp no a regresa Parlamento y e parlamentario Tevreden di mep cu kier a bira minister a wordo hala un banda.
NOS TA SIGUI KERE DEN CASUALIDAD?
Un cos ta sigur, e partidonan POR, RED, AVP y MEP ta esnan cu a vota pro. Militantenan di partido mep mes tin problema den nan seno paso solamente 2 hende a bay dilanti den voto y tur otronan a bay atras. Nan mes tabata papia di un fraude electoral. Lastimamente cu no tabata tin transparencia pa locual cu trata e votacion cu a tuma lugar dia 25 di juni 2021. Tur 2 partidonan avp y mep a bay atras den voto y e otro 2 a cay considerablemente den voto cu nan no a yega Parlamento. Na Hulanda PvdA ta esun cu a bin cu e ley aki. Mira unda PvdA ta awe. PvdA ta casi desaparese for di Parlamento. Ainda nos ta sigui kere cu Dios no ta existi?
Pa nos trese un cambio aki na Aruba nos mester fortalese nos famianan. Un famia ta consisti entre homber y muher. Nos tarea ta fortalese e matrimonio pa asina nos por construi un sociedad solido cu lo trese un cambio riba nos isla. Asina so nos lo mira e cambio den nos sociedad. Nos criminalidad y problemanan social lo baha sigur. E partidonan politico te cu awe no ta arrepenti sino ta sigui pusha y nos por mire den e resultado den eleccion. Nan lo caba na nada paso tur esnan cu a bay contra leynan di Dios ta bao di maldicion. Nos pueblo ta pasando den hopi turbulencia caba y e unico caminda cu ta keda nos como habitante di Aruba dushi tera ta di busca Dios di curason pa por logra e cambio. Nos ta den e tempo cu nos mester scohe entre Dios y baal. Si Dios ta Dios adore. Laga nos scohe pa Dios paso E ta stima nos tur pero no nos picanan. Dios semper ta dunabo un oportunidad pa arrepenti. E decision ta den bo man. Dios no ta cambia su leynan pa ningun hende pio pa hustifica nos fayonan, alcontrario Su leynan tey pa bai nos bon den bida. Tur cos por, pero no ta tur cos ta combini. Nos di partido Curpa no ta bai contra leynan di Dios sino Dios su leynan ta Si y Amen. Caso cerrado!!!!!!
