Un dokter di cas tin mas di 2300 pashent. Pa un miho servicio, e dokternan di cas ta di pensamento cu baha nan cantidad di pashent ta un opcion. Algemene Ziektekosten Verzekering (AZV) tambe ta di mesun pensamento.
Solange Tchong, relacionista publico di Organo Ehecutivo AZV, a informa cu e maximo di pashent inscribi cu un dokter di cas por tin ta rond di 2455. E cifra aki ta subi y baha un poco, pasobra tin cu tene cuenta cu pareha cu yiu semper kier inscribi nan yiu generalmente na nan mesun dokter di cas. P’esey semper mester tin un espacio pa esey. Tambe tin e parti cu pashent ta fayece y aki cupo ta habri.
AZV a ripara cu den e ultimo añanan nan tin un presion riba esey. Nan ta den combersacion cu HAVA, asociacion di dokter di cas, pa motibo cu a ripara cu a experencia esey hopi. Ta sinti un presion den e trabou.
Tin diferente cos cu AZV a haci. Den 2012 nan a introduci e praktijkondersteuners, cu ta nurse special. Nan ta yuda pashent manera esunnan diabetico pa guia nan, y asina crea espacio cu e dokter di cas di su banda por consulta otro tipo di pashent cu n’e momento ey mester di cuido. E ta un realidad cu AZV falta mas dokter di cas pa baha e cifra mas abou. E deseo di dokternan di cas ta pa tin un cifra di mas o menos 2100 pashent of menos. E dokternan di cas ta di pensamento cu esey lo duna un miho resultado den e parti di servicio. AZV di su banda ta kere mesun cos.
