Den e ultimo temponan tabatin hopi keho riba e servicio cu e dokternan di cas ta duna of e accesibilidad di cada dokter di cas.
Solange Tchong, Relacionista Publico di Aseguro Medico General (AZV) a cuminsa na bisa cu diariamente nan ta den contacto cu nan aseguradonan, e clientenan por yama y manda carta. El a splica cu AZV tin dos proceso: Ora cu e cliente no ta satisfecho cu e servicio brinda door di un dokter of e trata cu el a haya na e dokter, e por yama pero tambe manda un carta. Un caso asina ta AZV ta trat’e como un keho, un reclamo.
Den pasado, e kehonan tabatin di haber cu e disponibilidad y accesibilidad di e dokternan di cas. Pero esaki a mehora grandemente, si wak e cantidad di kehonan cu a baha masha hopi mes. Awo tin un miho organisacion di un agenda y schedule di e dokternan di cas. E asistentenan di dokter como tambe e sistema di triage, cu ta e sistema di categorisa ki sintoma e pashent tin, cual por bay prome cu otro, a yuda.
Si aki aya nan ta haya keho, AZV ta traha den colaboracion cu HAVA cu tambe tin un procedura di keho, un Comision di Keho, cu ta atende cu e kehonan cu ta referi n’e dokter di cas of su oficina.
