Diabierna mainta a tuma luga un caso sumario (kortgeding) entama pa Stichting Onroerend Goed Aruba (SOGA) contra di Stichting Ziekenverpleging Aruba (SZA) y Land Aruba (gobierno). E caso ta relaciona cu e sala di operacion na edificio bieu cu SOGA ta pidi pa haci bashi y uza esunnan nobo, pa asina e proyecto di construccion por continua y conclui. Di nan banda, (SZA) ta nenga di haci esey indicando cu e sala di operacion nobo tin diferente defecto y no ta cumpli cu e standard y como tal no ta garantisa e bienestar di e pashent.
Proyecto di hospital nobo a inicia na 2015 den diferente fase. Ta asina leu cu a entrega tres sala di operacion den e edificio nobo pa asina cuminsa haci uzo di nan y laga esunnan anterior y rond di nan bashi pa por haci e trabounan necesario na e edificio bieu.
Pero despues di a haci e traspaso, Hospital a constata cu e salanan di operacion nobo tin varios defecto, principalmente vloer cu no ta nivela (even) y no tin e caracteristicanan necesario pa siguridad contra candela y pa purificacion di aire cu, na su luga, ta evita infeccion ora di cirugia.
Desde e momento ey ta den un bay bin cu SOGA pa haci e cambionan necesario prome cu nan por muda di sala di operacion. Sinembargo, SOGA su ponencia ta cu nan a entrega un trabou cu a keda aproba y e salanan di operacion ta uzabel. E negacion di hospital pa sali di e edificio bieu ta representa costo substancial adicional pa e proyecto cu eventualmente lo keda traduci den e huur cu Hospital y gobierno lo paga pa haci uzo di dje. Pa mas detaye di e caso, lesa e proximo edicion di TREMPAN.
