Dialuna awo den parlamento ta trata introduccion di ley LNT. Sindicato Independiente di WEB Aruba (SIWA) a vocifera nan pensamento riba esaki cu lo por afecta mas e trahadonan di WEB.
Un di e partinan principal ta cu na momento cu e LNT bay mishi cu diferente trahado ariba, pero den e CAO cu su persona Eric Henriquez, presidente di SIWA, ta representa no ta mishi cu ningun. Pero esey no kiermen cu eventualmente den futuro e lo yega eynan, pasobra e fenomeno di trigger down lo bini. Na momento cu esaki bini, automaticamente ta mishi cu esun di nan. “Si nos mester hinca den nos cabes cu e no ta mishi nos, wel nos mester cuminsa saca esey”, el a vocifera. Eventualmente e lo yega aunke e lo dura. Desde comienso nan mester ta alerto.
Un parti cu sindicato SIWA mester ta alerta, ta ora cu e profesionalnan no kier bin bek eherce funcion den WEB door di e top cu a bini. E ora ey ta bay haya cu no por garantisa e WEB cu tin aworaki. E profesionalnan cu a bay siña afo no ta bay bin Aruba asina no mas, pero esey tambe ta por traha un averechts (ta bay cay atras) p’e compania. Tin cu salvaguardia cierto parti. P’e trahadonan directamente, e miembronan di CAO, sin duda mester tene cuidou cu e trigger efect.
Tin un articulo dos, iciso dos lid b ta bisa cu por exonera, pero no tin garantia cu por exonera nan den e parti eynan of ta pone nan den un otro tratado. Tur empresa ta bisa cu nan ta esun mas importante. WEB lo bisa esey, pero tambe Setar, ANSA, Elmar y nan tambe tin punto valido. Pero den caso di WEB, nan no tin e garantia ey. Segun Henriquez, unabes no tin e garantia ey e ta bira dificil y con ta atende esaki directamente.
Pa loke ta e cifra di 261 mil, su persona no ta compronde con a yega na esey. E ta kere cu mester tin un bon splicacion con nan a yega na dje, di unda esey a bin y dicon e ta net 261. Semper tabata papia di 130% dje salario di prome minister y esey ta algo cu no ta cuadra.
E ta spera cu e parlamentarionan haci nan trabou debidamente. Y cu nan haci pregunta al caso ora trata e ley di LNT.
Pa mas lesa TREMPAN.COM.
