Durante e accion di protesta diabierna riba e Plaza di Independencia (Onafhankelijkheidsplein) na Paramaribo, Surinam, e manifestantenan a purba drenta e edificio di Parlamento.
Tambe tabata tin daño ocasiona na e edificio aki y otronan den bisindario. A tira tambe cu piedra y boter. E diferente unidadnan a haci nan maximo esfuerso pa tene e situacion bou di control.
Polis a hay’e den necesidad pa haci uzo di gas lacrimogeno y lansa tironan di advertencia. A reina un situacion di caos.
Despeus cu polis a haci uzo di gas lacrimogeno, un grupo di manifestante a bay den centro di ciudad pa asina comete actonan di vandalismo
Tabata tin un grupo di manifestantenan cu a purba di comete sakeo y a comete destruccion riba e porta di glas di SHELL, ora cu e trahadonan a cera esaki cu yabi. Despues nan a destrui tur e bentananan y laga destruccion atras. Tambe riba un otro compania, nan a purba di comete destruccion ora cu nan a topa cu e portanan di hero di e luga, na candal.
pero e autoridadnan competente, ainda no a bin dilanti pa asina duna un declaracion di kico ta loke nan ta bay haci pa purba contene e situacion pa e no bay completamente for di man.
PROTESTA CONTRA GOBIERNO
E protesta aki ta un protesta contra di e maneho di e Gobierno di Santokhi- Brunswijk.
E activista politico Stephano ‘Pakittow’ Biervliet siman pasa a pidi tur su siguidonan pa un acto di protesta contra di e mal maneho di Gobierno. Pero no solamente esaki, e accion di protesta tabata tambe e actitud di tolerancia cu cierto sindicatonan a tuma.
Segun Pakittow, placa di e trahadonan ya no ta yega mas, pero asina mes e sindicatonan ta manera na soño. Segun e activista, el a scoge e fecha di 17 di februari precisamente ya cu mester di tempo pa prepara e accion aki.
Mas aleu, e activista a bisa cu e costo di bida a bira impagabel pa e pueblo. “Prome a introduci BTW y awo prijs di gasoline a bay halto. Gobierno kier spaar riba custia di e pueblo, pero e presidente mes ta tur luna e ta di biahe.
Durante e accion di protesta aki, un agente policial y tambe un militar a resulta herida durante e accion di protesta di diabierna, organisa door di Stephano ‘Pakittow’ Biervliet. E manifestantenan a tira boter, piedra y otro obhetonan skerpi riba nan. Un di nan a ricibi un corta na su man mientras cu e otro a haya un corta cerca di su wowo. A transporta ambos pa hospital pa ricibi tratamento medico.
