Varios sindicato a reuni cu minister-president, minister di husticia y minister di enseñansa pa trata varios punto. Un di e sindicatonan cu tabata presente den e reunion ta Sindicato di Polis Aruba (S.P.A.). Rodney Solognier, presidente di e sindicato, a indica cu a purba splica e mandatarionan cu e prestatiemanagement cu a drenta na vigor desde prome di januari no por ta posibel.
Solognier a cuminsa splica cu tin varios elemento cu mester tene cuenta cu ne prome cu cuminsa cu e prestatie management. Un di nan ta cu e hendenan no ta prepara ainda pa e sistema aki. Tin mas punto cu nan a trece dilanti na e mandatarionan. Solognier a continua bisando cu a pidi e mandatarionan un temporada pa nan por adapta y yega na mesa cu otro.
Rolando Maduro, vice-president di e sindicato, a indica cu un di e puntonan cu mester yega na dje ta e ziektenbeleid. El a indica cu ta un peso basta grandi pa e sector di ambtenaar mirando cu tin diferente malesa cronico cu tin consecuencia cu ne. Maduro a indica cu ningun hende ta pidi pa bira malo pero e beleid ta algo cu mester traha riba dje.
Un otro punto cu mester cuenta cu ne ta e parti di dwangbaarheid. Esaki, segun Rolando Maduro, ta algo cu ta para duidelijk den e International Labour Organization (I.L.O.), caminda ta indica cu no por dwang un trahado pa e yena su prestatiemanagement. A keda riba mesa pa Gobierno di Aruba publicamente indica cu lo wanta un rato y consulta cu e sindicatonan pa asina por yega na un acuerdo. Asina ta cuminsa riba un bon pia cu e prestatiemanagement.
Por ultimo, Rodney Solognier, a indica cu a informa gobierno cu lo negosha p’asina por yega na un acuerdo. Te ainda falta basta informacion cu gobierno y Departamento di Recurso Humano mester saca afo.
