Ta un di e temporadanan mas druk pa Cuerpo Policial. Carnaval pa algun ta e temporada di alegria, goso y felicidad. Pa otro ta e temporada di detencion, bringamento y luz blauw cada skina. E polisnan ta informa cu lo tin extra vigilancia riba caya. Pero pa straño cu e por zona, nan mes no ta sigur riba caya. Hopi polis no tin ‘bulletproof’ vest, segun a compronde for di Presidente di Sindicato di Polis, Rodney Solognier.
Cos ta asina alarmante cu e polisnan mes a dicidi di cumpra nan propio vest for di nan salario. Solognier ta contento cu nan a haci esey, pero esey no ta e idea. Ta responsabilidad di Gobierno di Aruba pa percura pa e departamentonan ta bon ekipa, locual no ta e caso awo. E presidente di e sindicato ta urgi e minister di husticia pa regla e asunto aki manera el a priminti. Fakkel ta e prome di carnaval y e polisnan no ta bon ekipa. “Ban spera nada serio pasa y pa Dios ta cu nos”, asina e presidente di sindicato di polis a duna di conoce.
No ta vest so, sino uniform tambe ta den un situacion deplorabel. Ta solamente dos carson nan a ricibi y practicamente tin cu “bati seca” den nan. Tin cu hasta ni tin carson mas, ta uzando otro tipo di carson. Esey ta sin conta ‘safety shoes.’ For di prome di januari 2023 cu tabatin un ‘aanlanding’ cu persona nan indocumenta a yega tera, mayoria polis cu a bay yuda, awe ta sin sapato. A bay den lama cu e sapato y awe e sapato no ta sirbi mas. Ta spera pronto, Minister Rocco Tjon atende cu e asunto aki.
