E sindicato di maestronan di Aruba, SIMAR, a reacciona mesora ayera despues di publicacion di e conferencia di prensa emiti door di Crisisteam. Ey Sharline Koolman di Departamento di Salud Publico di Aruba a expresa cu un di e causantenan di e di cuater ola di Covid-19 cu nos ta aden actualmente na Aruba, ta ora cu e meneer y juffrouwnan di scol a sali masalmente pa “spula krijt”. Sinembargo, e declaracion no a cay den bon tera cerca e sindicato cu ta representa e maestronan di nos pais.
Riba red social, mesora Josephine Albertus , presidente di SIMAR, a publica cu “Como sindicato representando maestronan, nos ta lamenta cu señora Koolman di DVG a pone e celebracion di fin di aña escolar Spula Krijt como e causante di e brote di e di cuater ola di Covid riba isla di Aruba. Esaki ta pone e maestronan den un luz negativo den wowo di pueblo. Como cu esaki ta un acusacion basta fuerte, lo ta bon pa publica tur cifra y datos cu ta prueba esaki”.
Mester menciona cu pa hopi aña caba e maestronan ta sali riba ultimo dia di scol pa varios eventonan social. Ta un dia masha comercial den cual clubnan nocturno, barnan y cafe ta pone evento special pa e maestronan por celebra cu scol a cera. Den algun di nan tin hasta banda musical pa asina haci e evento mas grandi ainda. E aña aki esey no tabata un excepcion y awo DVG ta insisti cu ta for di e dia ey a start cu contagio masal y cu awe nos ta papia di e di cuater ola di Covid riba nos isla.
E sindicato sinembargo no kier pa e keda djis un “tiramento di culpa” riba e maestronan di scol, sino tambe pa prueba esaki publicamente. E sindicato ta desea di mira e prueba, preto riba blanco, unda ta confirma cu ta e maestronan tabata e portadonan y cu a contagia tanto hende asina te cu nos isla tabatin riba mil caso activo pa basta dia caba. De lo contrario e maestronan lo desea un disculpa publico di parti di DVG y di su vocero, Sharline Koolman, pa e declaracion haci den conferencia di prensa hunto cu Minister Presidente Evelyn Wever-Croes.
