Den e reunion e docentenan hunto cu e directiva a bin na acuerdo pa tene un marcha pacifico diaranson mustrando nan mal contento contra di Minsiter di Enseñansa Rudy Lampe y entrega un manifiesto na ministernan.
E marcha aki lo ta saliendo desde 3:00PM for di ex DOW direccion pa Bestuurskantoor. Sindicato Seppa y SPA a duna nan sosten na SIMAR unda cu nan tambe lo ta marchando hunto cu e docentenan.
Hopi docente y esnan cu ta den veld di enseñansa a presenta na e reunion y a mustra nan disgusto. E sindicato por a duna e docentenan tur informacion cu nan tin na e momentonan aki y no por a duna tur cos. Segun Josephine Albertus, presidente di SIMAR, nan no tin tur informacion, pasobra nan no ta envolvi den tur cos.
A traha un pakete di documento cu ta consisti di 107 pagina y a comparti esaki cu tur hende presente. Tur cu tabata presente no tabata di acuerdo cu kico ta pasando y esaki mester stop. Nan ta cla pa tuma un stap extra atrobe pa vocifera esaki.
Tur sindicato tin nan reunion, pasobra nan tur ta haya importante pa duna informacion na e miembronan. Sindicato SIMAR lo ta acercando e otro sindicatonan pa mira si nan tur por uni, pasobra union ta e forsa. Asina aki hunto lo por sali mustra cu kico ta pasando actualmente no por.Cierto veld ta afecta mas cu otro, segun Albertus. Den veld di enseñansa tin tanto cambio, tanto cos ta cambia y a trece hopi disgusto. Tur cos cu e sindicato ta bisando pa tanto tempo ta un realidad y a comproba esaki durante e reunion. Ora cu sindicato ta vocifera algo, nan sa cu e veld ta para nan tras. SIMAR ta vociferando kico tin den veld, p’esey mester sa di nan. SIMAR no ta envolvi den tur cos y no tabata sa di tur cos.
E Minister di Enseñansa tin e cartera, no por haci otro pero keda sinta na mesa. SIMAR ta kere den dialogo, consulta lo por yega un caminda pero no ta haya esey bek for di gobierno. Tin parti di enseñansa y otronan cu a conoce cambionan, y awo lo pone tur cos hunto p’e informacion conhuntamente yega unda e mester yega.
Den e marcha aki tur hende, esta mayor, studiantenan, por participa. Ta bay entrega un carta, normalmente ta manda esaki via un email, pero e biaha aki no. E disguto ta asina hopi cu kier bin cu un marcha. Lo duna mas informacion via rednan social.
E miembronan tambe ta disgusta cu e indexering. Segun Albertus tur cos ta bay unilateral no tin consulta, no ta sinta na mesa. Tur ta compronde cu Aruba ta den crisis y niun no kier pa un bisiña bay drumi sin cuminda, pero mester sostene tur hunto. Pa tur por sostene, mester sinta na mesa pa tur bin cu un decision cu tur hende por carga. “Lamentablemente esey no ta pasando,” el a bisa.
