E Sindicatonan di Maestro di Aruba (SIMAR) a manda un carta di protesta pa Gobierno den cual ta expresa nan malcontento pa e forma cu ta atende cu diferente problema durante e crisis di COVID-19. “Simar ta keda mas y mas babuca tur dia ora di ripara con Gobierno ta solucionando e problemanan di e crisis. Desde cu COVID-19 a yega Aruba, Gobierno su strategia tabata simplemente informa,” e Presidente di SIMAR Josephine Albertus a bisa.
Gobierno ta hibando ningun forma di dialogo y den forma unilateral a dicidi di kita e 12.6% di salario di empleadonan publico, incluyendo e 5% cu ta wordo kita directamente di e salario. SIMAR tin pregunta riba esaki manera con ta bay retene e 5%, esta di e salario fiho of ta traha un code apart cu yama covid.
El a splica cu kita for di e salario fiho, tur loke cu ta paga na primanan tambe ta baha, entre otro e pago di pensioen. Ta cosnan cu no sin mas por mishi cu nan, segun e presidente di SIMAR. “Nos ta compronde cu tin crisis y mester busca solucionnan. Pero e mester sosode di un forma husto. Te awe sindicatonan no a sinta bek na mesa pa splica tur e puntonan aki ni firma un documento. Awo no tin siguransa cu e ta te december.” El a agrega cu Gobierno por bisa despues cu e mester ta mas largo of Hulanda a dicidi cu e mester ta pa tanto tempo. Y esaki ta algo cu nan no por acepta sin mas.
Nan ta masha frustra pasobra desde yegada di Covid-19 no tin ningun sorto di dialogo y djis simplemente informa di decisionnan tuma. Te ainda ta sperando contesta riba e ultimo carta cu nan a manda pa Gobierno. “Tin cierto cosnan ta canando pero no di e forma corecto. Nos no ta strobando, nos kier claridad. Nos ta biba den un pais democratico, unda mester sinta hunto y dialoga, manera na Hulanda.”
Asina por ehempel Gobierno tabatin un reunion awe di directivanan di scol cu crisisteam riba apertura di scolnan, cu mester a tuma luga awe. Sinembargo e sindicatonan no a haya invitacion pa e reunion en cuestion. Simar mester tabata presente pa mira cu cosnan ta sosode manera debe ser.
SIMAR ta kere cu e protocol di DVG ta bon pa hinca den otro, pero tin cierto scolnan no por cumpli cu tur e rekisitonan, manera klasnan no ta suficientemente grandi. Y di un forma asina e scolnan no por habri. :”E ta tuma tempo, no por bisa di awe pa yama cu scol ta habri. Tin hopi aspecto pa tene cuenta cu ne. Mester tin dialogo y sinta discuti cu esnan concerni.” Di otro banda, no tin igualdad den enseñansa pasobra muchanan cu no tin internet no por sigui les di e forma corecto.
Segun e Presidente, no por duna un fecha ora scolnan por habri. Aworaki ta mas importante siguridad di tanto studiante como maestronan pa ora cu lesnan cuminsa atrobe. “Niun scol por sigura esaki. Mester wak infrastructura di cada scol, duna cada espacio pa e traha su plan di con dunamento di les por sigui.”
Ta hopi factor extra tin cu tene cuenta cu nan prome cu por bisa scol ta cla pa habri, specialmente con pa atende for di e sistema tradicional pa un sistema digital, si ta di e forma aki e dunamento di les mester tuma luga.
