Relaciona cu locual ta pasando den e veld di enseñanza nos di 24ora.com a busca un reaccion di presidente di sindicato SIMAR. Pa recapitula, awe mainta den un reaccion riba Hits 100, director general di EPI, Ryan Maduro y director di enseñanza di EPI, Cindy Whithfield, a clarifica e rumornan andando cu Colegio EPI lo bay elimina cierto opleiding.
Segun nan a splica, nan ta bay simplemente renoba e curiculo di e scol, cu a conoce un renobacion ultimo biaha na 2009 y ta debi cu tin fondo limita, en berdad lo mester bay para algun opleiding temporalmente, pero no lo elimina esakinan sin mas.
Mas cu claro, esaki aki a trece un inkietud y preocupacion grandi tanto p’e studiantenan como tambe e mayornan. Den un reaccion breve di e presidente di sindicato SIMAR, Josephine Albertus a bisa cu ya di parti di e sindicato nan a informa e minister concerni di e inkietud cu ta reinando na EPI y cu e minister a keda di tuma contacto bek cu ne e siman aki pa un reaccion y ‘update’. Alabes el a enfatisa si cu te ainda e maestronan di EPI no a acerca e sindicato pa bisa cu “cos no ta canando bon”, pues ta wardando pa esaki tambe p’asina tuma accion.
