Como Presidente di Comision di Enseñansa mi a invita dia 26 di januari 2022 Minister Endy Croes pa un reunion pa e por presenta Maneho di Enseñansa 2021-2025 yama ‘Enseñansa den Transicion’. E reunion a bay hopi bon caminda Minister Croes a cuminsa repasa su punto di salida pa loke ta trata e maneho stipula. Minister a enfatisa cu hopi a wordo pensa, skirbi y planea y cu documentacion existente ta ilustra esaki claramente. Kisas no tur ora tabata cu conocemento y a base di participacion di tur actor, pero cu despues di a sinta cu e actornan principal den enseñansa, e por constata cu ta existi un pensamento común pa loke ta trata enseñansa.
Mirando tur e retonan financiero existente Minister Croes a trata tambe e situacion financiero general a base di e presupuesto 2022 cu ta na caminda pa Parlamento. Esaki pa e por ilustra cu mester traha a base di prioridad mirando cu fondonan ta mas limita cu antes. Asina mes banda di presupuesto di Husticia, Enseñansa ta e di dos ministerio mas grandi pa loke ta trata presupuesto, esta casi 281 miyon florin. Banda di e retonan financiero, Minister a indica cu su meta ta pa traha pa tur stakeholder pone diferencianan un banda, crea union y pone energianan positivo hunto cu tur nanishinan den mesun direccion. Asina so nos lo por cosecha adelantonan grandi y necesario cu ta necesario pa enseñansa y bienestar di nos comunidad. Pesey e lo sigui traha a base di participacion integral.
E nota di maneho ‘Enseñansa den Transicion’ ta basa riba 3 punto di salida: Plan Educacion Nacional 2030, Sustainable Development Goals nr 4 y mas cu claro Landspakket Aruba. Pa e añanan nos dilanti gobierno a fiha 3 punto prioridad, esta 1) Calidad basico di enseñansa, 2) Enseñansa pa un y tur (inclusion y lifelong learning) y 3) Desaroyo di competencianan di siglo 21. Pa logra esakinan Minister a presenta e puntonan di accion necesario manera registracion di data, modernisacion di leynan, profesionalisacion y liderazgo fuerte, comunicacion, colaboracion, digitalisacion, enforsa nos structura di cuido, atencion pa curiculo y maneho di idioma integral et cetera.
Pa loke ta trata aña 2022 Minister a indica cu tin 4 prioridad cual ta: actualisacion di nos leynan di enseñansa, introduci un sistema di registra data, optimalisa nos sistema financiero y yega na un maneho integral di idioma. Tambe lo duna atencion special na e topiconan SMW’ers, Invallers, Nietzittenblijvenbeleid, Bermudeznorm y infrastructura.
Minister a termina e presentacion enfatisando cu su maneho lo ta basa riba un participacion integral di tur actor den enseñansa pero tambe riba responsabilidad di un y tur. E lo bay dirigi enseñansa a base di e filosofía SMART cu ta para pa fiha metanan cu ta specifico, por keda midi, ta realistico y cu ta mara na tempo.
Lastimamente nos no por a finalisa e ronda di pregunta pa motibo di tempo y otro compromiso pero a keda palabra cu lo yama e siguiente reunion pronto pa finalisa esaki y posiblemente trata e doorlichting rapport di enseñansa cu ta den su fase final y cu ta un producto di Landspakket Aruba. Na final di e reunion Minister a haci entrega di e nota di maneho na Parlamento.
Mi kier termina bisando cu mi ta convenci cu si tur stakeholder uni, fiha metanan nucleo pa cu nos enseñansa, mantene dialogo constantemente habri, nos por logra mehora nos enseñansa y logra resultadonan positivo, necesario y importante cu lo beneficia desaroyo di nos hendenan y nos pais.
